سی ڈی اے مزدور یونین کے زیر اہتمام کرسمس و نئے سال کی تقریب، چیئرمین سی ڈی اے کی شرکت، ملازمین کے مسائل حل کرنے کی یقین دہانی

اسلام آباد(صدائے سچ نیوز)سی ڈی اے مزدوریونین (سی بی اے) کے زیر اہتمام کرسمس اور نئے سال کے حوالے سے تقریب سینی ٹیشن ڈائریکٹوریٹ سیکٹر جی سکس میں منعقدہوئی جس کے مہمان خصوصی چیف کمشنرو چیئرمین سی ڈی اے چوہدری محمد علی رندھاواتھے۔

تقریب میں سی ڈی اے کے ممبرفنانس طاہر نعیم اختر،ممبرانوائرمنٹ اسفندیاربلوچ،ڈی جی انوائرمنٹ اویس منظورتارڑ،ڈی جی سوک منیجمنٹ عبدالرزاق،ڈائریکٹروقاص علی،ڈپٹی ڈائریکٹرعلی مرتضیٰ بخاری،اسسٹنٹ ڈائریکٹراقتدارحسین،سی ڈی اے مزدوریونین کے جنرل سیکرٹری چوہدری محمد یٰسین،صدراورنگزیب خان،چیئرمین راجہ شاکر زمان کیانی،اظہارعباسی،ملک عاصم،اظہر خان تنولی،ملک دلشاد،خالد محمود،سردارآصف،چوہدری منیر،وارث دلیپ،سلیم بھٹی،طارق شریف،کلیم اللہ زمری،نشاط اکبرستی،رانا ندیم،فاروق نور،راجہ نقاش،اشفاق گجر،تشکیل جاوید بھٹی،سلیم راجپوت،حاجی جنید،چوہدری جارج،چوہدری نذاکت،یعقوب خان سمیت سی ڈی اے مزدوریونین کے دیگر عہدیداران،سی بی اے کمیٹیزکے نمائندگان،سی ڈی اے ملازمین سمیت مسیحی برادری نے کثیرتعدادمیں شرکت کی۔

تقریب سے خطاب کرتے ہوئے سی ڈی اے مزدور یونین کے جنرل سیکرٹری چوہدری محمد یٰسین نے کہا کہ کرسمس کا تہوارامن اور بھائی چارے کا درس دیتاہے اور آج ہم یقینا ان کی خوشیوں میں برابر کے شریک ہیں اورآج کے دن کی مناسبت سے تمام مسیحی برادری کو مبارکبادپیش کرتے ہیں۔

چوہدری محمد یٰسین نے کہا کہ سی ڈی اے مزدور یونین نے ہمیشہ رنگ،نسل اورمذہب سے بالاترہوکر تمام ملازمین کی خدمت کی ہے اور ہم نے اپنے عمل سے ثابت کیا ہے کہ جہاں ہم نے اپنے مسلم ملازمین کو مراعات دلوائیں وہاں ہم نے اپنے مسیحی ملازمین کو انکے مذہبی تہواروں پر بونس الاؤنس دلوانے سمیت انکومذہبی مقام ویٹی کن بھیجوانے سمیت دیگرتاریخی مراعات دلوائیں اور آئندہ بھی ان کے باقی ماندہ مسائل کو ترجیح بنیادوں پر حل کروائیں گے۔

انھوں نے کہا کہ ہم اللہ تعالیٰ کے فضل وکرم سے پانچویں دفعہ ریفرنڈم میں کامیابی حاصل کی ہے اورہم ہمیشہ مذاکرات کے ذریعے مسائل حل کرنے پر یقین رکھتے ہیں۔

اس موقع پر انھوں نے چیئرمین سی ڈی اے سے مطالبہ کیا کہ سینی ٹیشن ڈائریکٹوریٹ کے فیلڈسٹاف کے لیے سائیٹ آفسزکے قیام کے ساتھ ساتھ انکے اوورٹائم اورخطرہ الاؤنس دیا جائے اورملازمین کے دیگرمسائل کو ترجیح بنیادوں پر حل کیاجائے۔

تقریب سے خطاب کرتے ہوئے چیئرمین سی ڈی اے محمد علی رندھاوانے کہا کہ کرسمس کا تہوار ہمیں ایثار، قربانی، صبر اور انسانیت سے محبت کا پیغام دیتا ہے جو ہر معاشرے میں ہم آہنگی اور باہمی احترام کے فروغ کے لیے نہایت اہم ہے اورآج ہم اس بابرکت تقریب کے موقع پر اپنے مسیحی بھائیوں اور بہنوں کی خوشیوں میں برابر کے شریک ہیں اور انہیں دلی مبارکباد پیش کرتے ہیں۔

اس موقع پر انھوں نے کہا کہ ہم سی ڈی اے ملازمین کے مسائل سے بخوبی آگا ہ ہیں اور بطورادارہ سربراہ ہم سینی ٹیشن کے دوران ڈیوٹی حادثے کا شکار ہونے والے ملازم عثمان انورکی شہادت پر افسوس کا اظہار کرتے ہیں اور یقین دلاتے ہیں کہ ان کے خاندان کو پوراانصاف دلوائیں گے اور انکے ورثاء کو ادارے کی طرف سے ایک بہترین پیکیج دیا جائے گا تاکہ ان کے گھر کا چولہا چلتا رہے اور تمام سینی ٹیشن ملازمین کو اوورٹائم،خطرہ الاؤنس سمیت دیگرمسائل حل کریں گے۔

تقریب کے اختتام پر کرسمس اور نئے سال کی خوشی میں کیک کاٹا گیا۔