وفاقی حکومت پریس کلبوں کی معاونت کے لیے سنجیدہ اقدامات کر رہی ہے، مالی امداد بڑھانے پر کام جاری ہے، مبشر حسن

لاہور(صدائے سچ نیوز) وزیراعظم اور وفاقی وزیر اطلاعات و نشریات کی ہدایت پر پرنسپل انفارمیشن آفیسر مبشر حسن اور ڈائریکٹر جنرل پریس انفارمیشن ڈیپارٹمنٹ (پی آئی ڈی) لاہور شفقت عباس نے لاہور پریس کلب کے صدر ارشد انصاری اور دیگر عہدیداران کے ساتھ ایک تفصیلی ملاقات کی۔

اجلاس کے دوران صدر لاہور پریس کلب ارشد انصاری نے صحافیوں اور میڈیا ورکرز کو درپیش مسائل، بالخصوص ہیلتھ انشورنس کے حوالے سے جامع بریفنگ دی۔ انہوں نے وفاقی حکومت سے مطالبہ کیا کہ صحافیوں کے دیرینہ مسائل کو ترجیحی بنیادوں پر جلد حل کیا جائے۔

انہوں نے چیئرمین آئی ٹی این ای کی تعیناتی میں تاخیر پر بھی تشویش کا اظہار کرتے ہوئے اس عمل کو فوری مکمل کرنے کی درخواست کی۔ اس موقع پر پرنسپل انفارمیشن آفیسر مبشر حسن نے بتایا کہ چیئرمین آئی ٹی این ای کی تعیناتی آخری مراحل میں ہے۔

انہوں نے کہا کہ وفاقی حکومت پریس کلبوں کی معاونت کے لیے سنجیدہ اقدامات کر رہی ہے اور پی ٹی آئی حکومت میں عائد کی گئی پابندیوں کو ختم کر کے پریس کلبوں کی مالی امداد بڑھانے پر کام جاری ہے، تاکہ پریس کلب صحافیوں کی فلاح و بہبود کے لیے موثر کردار ادا کر سکیں۔

مبشر حسن نے مزید بتایا کہ وفاقی حکومت نے صحافیوں کیلئے وزیراعظم ہیلتھ انشورنس سکیم کے لیے خطیر رقم مختص کر رکھی ہے، جس سے کم از کم پانچ ہزار صحافی مستفید ہو رہے ہیں، تاہم گزشتہ برس مختص فنڈز کا صرف 29 فیصد استعمال ہو سکا۔

انہوں نے امید ظاہر کی کہ آئندہ برس زیادہ سے زیادہ صحافی وزیراعظم ہیلتھ انشورنس اسکیم سے فائدہ اٹھا سکیں گے۔ انہوں نے کہا کہ کابینہ کی منظوری کے بعد پریس کلبوں کو مالی معاونت کی فراہمی کی راہ مزید ہموار ہو جائے گی۔

انہوں نے اس عزم کا بھی اظہار کیا کہ صحافیوں اور میڈیا ورکرز کی بہبود کے لیے تمام دستیاب وسائل بروئے کار لاتے ہوئے آٹھویں ویج بورڈ ایوارڈ پر حقیقی معنوں میں عملدرآمد یقینی بنایا جائے گا تاکہ کسی بھی صحافی یا میڈیا ورکر کا استحصال نہ ہو۔
اجلاس کے اختتام پر صدر لاہور پریس کلب ارشد انصاری نے حکومت کی جانب سے صحافیوں کے لیے کیے گئے اقدامات کو سراہتے ہوئے مستقبل میں مثبت تعاون کی امید ظاہر کی۔

اجلاس میں پرنسپل انفارمیشن آفیسر مبشر حسن ، ڈائریکٹر جنرل پی آئی ڈی لاہورشفقت عباس، ڈائریکٹر پی آئی ڈی لئیق باجوہ، ڈپٹی ڈائریکٹر پی آئی ڈی ارسلان طاہر، صدر لاہور پریس کلب ارشد انصاری، سیکرٹری لاہور پریس کلب زاہد عابد، سینئر صحافی خواجہ نصیر، عباس نقوی، سید فرزند علی اورقمر بھٹی نے شرکت کی۔