چیف جسٹس اسلام آباد ہائیکورٹ کی ماحولیاتی تحفظ کیلئے متحد ہونے کی اپیل

اسلام آباد (صداۓ سچ نیوز) چیف جسٹس اسلام آباد ہائی کورٹ سرفراز ڈوگر نے ماحولیاتی تحفظ کے لیے متحد ہونے کی اپیل کرتے ہوئے کہا ہے کہ موسمیاتی تبدیلی سنگین چیلنج ہے اور اجتماعی اقدامات ناگزیر ہیں۔

ارتھ آور کے حوالے سے اپنے بیان میں انہوں نے کہا ہے کہ گزشتہ 3 سال دنیا کے گرم ترین سال قرار پائے ہیں۔

چیف جسٹس سرفراز ڈوگر کا کہنا ہے کہ ترقیاتی منصوبے سے قبل ماحولیاتی اثرات کا جائزہ لینا لازم ہے۔

انہوں نے کہا کہ اسلام آباد ہائی کورٹ نے ماحول کے تحفظ کے لیے خصوصی گرین بینچ قائم کر رکھا ہے اور یہ بینچ نباتات اور حیوانات کے تحفظ کو یقینی بناتا ہے۔

چیف جسٹس اسلام آباد ہائی کورٹ نے کہا ہے کہ عدلیہ نے ماحولیاتی تحفظ کے لیے تاریخی فیصلے دیے اور جنگلات کی کٹائی اور تجاوزات کے خلاف بھی احکامات جاری کیے۔

انہوں نے یہ بھی کہا ہے کہ آج رات ساڑھے 8 سے ساڑھے 9 بجے تک اسلام آباد ہائی کورٹ کی عمارت کی روشنیاں بند رکھی جائیں گی۔