ملک میں مارچ میں پہلی ہیٹ ویو کا امکان

اسلام آباد (صداۓ سچ نیوز) ملک بھر میں رواں ماہ غیرمعمولی گرمی سے ہیٹ ویو کا خدشہ ہے۔

محکمۂ موسمیات کے مطابق مارچ 2026ء میں بارشیں معمول سے کم ہوں گی جبکہ درجۂ حرارت معمول سے زیادہ رہے گا۔ بڑھتے ہوئے درجۂ حرارت سے پنجاب، سندھ، بلوچستان میں مچھروں کی تعداد کم ہوگی۔

محکمۂ موسمیات کے مطابق زائد درجۂ حرارت کے باعث ربیع کی فصل وقت سے پہلے تیار ہونے کا امکان ہے۔ کم بارشوں کے باعث ربیع کی فصلوں کے لیے نمی کی دستیابی محدود رہے گی جبکہ خشک موسم اور زائد درجۂ حرارت چاول کی کٹائی کے بعد خشک کرنے اور ذخیرہ کرنے میں مددگار ثابت ہوگا۔ 

محکمۂ موسمیات کے مطابق اسلام آباد، راولپنڈی اور لاہور میں مارچ کے پہلے ہفتے سے پولن سیزن شروع ہونے کا امکان ہے۔ پولن کے باعث بچوں اور بزرگوں میں سانس کی بیماریاں بڑھنے کا خدشہ ہے۔

محکمۂ موسمیات کے مطابق پنجاب، سندھ اور خیبر پختونخوا میں خشک موسم کے باعث دھند کی شدت میں کمی آئے گی۔