وزیراعظم شہباز شریف نے نیشنل آئی ٹی پارک کا افتتاح کر دیا

 اسلام آباد (صداۓ سچ نیوز) وزیراعظم شہباز شریف نے اسلام آباد میں نیشنل آئی ٹی پارک کا افتتاح کر دیا۔

اسلام آباد میں تقریب سے خطاب کرتے ہوئے وزیراعظم نے کہا ہے کہ یہ ملک کا پہلا آئی ٹی پارک ہے جسے جدید تقاضوں کے مطابق تعمیر کیا گیا ہے اور یہ منصوبہ ملکی ترقی و خوشحالی میں اہم سنگ میل ثابت ہوگا۔

ان کا کہنا ہے کہ نیشنل آئی ٹی پارک نوجوانوں کے لیے ترقی کے نئے مواقع پیدا کرے گا، منصوبے کا سنگ بنیاد 2018-2017 میں رکھا گیا تھا، جبکہ اس کی تکمیل مصنوعی ذہانت اور انفارمیشن ٹیکنالوجی کے شعبوں میں پیش رفت کی عکاسی کرتی ہے۔

شہباز شریف نے کہا ہے کہ اس منصوبے کے ذریعے نئی کمپنیوں اور آئی ٹی ماہرین کے لیے مواقع پیدا کیے جائیں گے اور ملک بھر میں ایسے منصوبوں کا دائرہ وسیع کیا جائے گا۔ انہوں نے وزیرِ آئی ٹی اور ان کی ٹیم کی کاوشوں کو بھی سراہا۔

وزیراعظم کا کہنا ہے کہ نیشنل آئی ٹی پارک محض ایک عمارت نہیں بلکہ ٹیکنالوجی، جدت اور مہارت کا امتزاج ہے۔ 

انہوں نے مزید بتایا ہے کہ وہ ایک وفد کے ہمراہ جنوبی کوریا کا دورہ بھی کر چکے ہیں، جبکہ دانش یونیورسٹی کے قیام پر بھی تیزی سے کام جاری ہے۔

اس موقع پر وزیرِ مملکت برائے آئی ٹی شزا فاطمہ خواجہ نے کہا ہے کہ وزارتِ آئی ٹی کی ٹیم نے اس منصوبے کی تکمیل کے لیے بھرپور محنت کی ہے۔ 

انہوں نے منصوبے میں تعاون کرنے والے تمام متعلقہ فریقوں کو خراجِ تحسین پیش کیا۔

شزا فاطمہ خواجہ کے مطابق ملک بھر میں قائم سہولت مراکز سے مختلف علاقوں کے افراد مستفید ہو رہے ہیں، پاکستان کا پہلا آئی ٹی ٹاور لاہور میں ارفع کریم کے نام سے قائم کیا گیا، جبکہ پنجاب بھر میں بھی سہولت مراکز کا نیٹ ورک پھیلایا گیا ہے۔