سموگ کے پیشِ نظر پنجاب ہائی وے پٹرولنگ کی آگاہی مہم تیز، شہریوں کو احتیاط کی ہدایت

سرگودھا (صداۓ سچ نیوز) سموگ کے بڑھتے ہوئے اثرات کے پیشِ نظر پنجاب ہائی وے پٹرولنگ سرگودھا ریجن کی جانب سے عوامی آگاہی اور روڈ سیفٹی اقدامات تیز کر دیے گئے ہیں۔

ایس پی پنجاب ہائی وے پٹرول سرگودھا ریجن فرخ سہیل سندھو نے پٹرولنگ پوسٹ چک 67 شمالی کا دورہ کیا اور علاقہ کے معززین، عمائدین و پی ایچ پی کمیونٹی کمیٹی کے ممبران سے ملاقات کی اور انہیں ٹریفک قوانین کی پابندی، محفوظ ڈرائیونگ اور سموگ کے دوران احتیاطی تدابیر کے حوالے سے عوام میں شعور بیدار کرنے میں اپنا کردار ادا کرنے کی ضرورت پر زور دیا۔

انہوں نے کہا کہ سموگ کے موسم میں حدِ نگاہ متاثر ہونے کے باعث ٹریفک حادثات کے خدشات بڑھ جاتے ہیں، اس لیے شہریوں کو فوگ لائٹس کے استعمال، رفتار میں کمی، محفوظ فاصلہ برقرار رکھنے اور ٹریفک قوانین پر عمل درآمد کے حوالے سے آگاہی دینا ضروری ہے۔

انہوں نے کہا کہ پی ایچ پی کمیونٹی کمیٹیوں کے ممبران معاشرے کے بااثر افراد ہیں اور وہ پنجاب ہائی وے پٹرول کے ساتھ مل کر روڈ سیفٹی مہم کو مؤثر بنانے اور حادثات میں کمی لانے میں اہم کردار ادا کر سکتے ہیں۔

ایس پی پنجاب ہائی وے پٹرول نے کمیونٹی کمیٹی ممبران کے ہمراہ عوام الناس کو آگاہی لیکچر بھی دیا، جبکہ سست رفتار گاڑیوں پر ریفلیکٹرز لگائے گئے تاکہ رات اور کم حدِ نگاہ کے اوقات میں ان کی نمایاں شناخت ممکن ہو اور حادثات سے بچاؤ میں مدد مل سکے۔