پنڈی ٹیسٹ، پاکستان نے 434 رنز پر اننگز ڈکلیئر کردی

راولپنڈی (صداۓ سچ نیوز) پاکستان اور سری لنکا کے درمیان پنڈی کرکٹ اسٹیڈیم میں جاری پہلے ٹیسٹ میچ میں پاکستان نے 9 کھلاڑیوں کے نقصان پر 434 رنز پر اننگز ڈکلیئر کردی۔

آج کھیل کے دوسرے دن کے آغاز پر سعود شکیل 57 اور غازی غوری نے 7 رنز کے ساتھ دن کا آغاز کیا تو دن کی پہلی وکٹ غازی غوری کی گری جو 48 رنز بنا کر آؤٹ ہوگئے۔

کھانے کے وقفے تک پاکستان ٹیم نے 6 وکٹوں کے نقصان پر 390 رنز بنالیے تھے، پاکستان کی جانب سے وکٹ پر سعود شکیل 91 اور عرفات منہاس 27 رنز کے ساتھ موجود تھے اور 99 اوورز کا کھیل ہوچکا تھا مگر پھر واپس آکر سعود شکیل 93 رنز بنا کر آؤٹ ہوئے، ان کے بعد عرفات منہاس 52 رنز کے ساتھ پویلین لوٹے، فاسٹ بولر رضا اللہ نے 10 رنز اسکور کیے، قومی ٹیم نے 106.3 اوورز کا سامنا کیا۔

سری لنکا کی جانب سے فرنینڈو اور مدوشاندا نے 3، 3 کھلاڑیوں کو آؤٹ کیا جب کہ لہرو کمارا، میلان رتھنایاکا سمیت سونال کے حصے میں ایک، ایک وکٹ آئی۔

راولپنڈی کرکٹ اسٹیڈیم میں مہمان سری لنکن ٹیم کے کپتان کوشل مینڈس نے ٹاس جیت کر پاکستان کو پہلے بیٹنگ کرنے کی دعوت دی تھی۔