ملک کے مختلف علاقوں میں بارش اور برفباری کی پیشگوئی

اسلام آباد (صداۓ سچ نیوز) محکمہ موسمیات نے ملک کے مختلف علاقوں میں بارش اور برفباری کی پیشگوئی کر دی۔

محکمہ موسمیات نے اسلام آباد اور گردونواح میں گرج چمک کے ساتھ مزید بارش کی پیشگوئی کی ہے۔ محکمہ موسمیات کے مطابق پنجاب کے مختلف شہروں لاہور، راولپنڈی، اٹک، چکوال، میانوالی اور جہلم میں بھی بارش متوقع ہے۔

اسی طرح محکمہ موسمیات نے گجرات، گوجرانوالہ، مری، گلیات اور ملحقہ علاقوں میں بھی بارش کا امکان ظاہر کیا گیا ہے۔

خیبرپختونخوا کے اضلاع چترال، دیر، سوات، کوہستان، شانگلہ، بٹگرام اور بونیر میں بارش کی توقع ہے جبکہ مالاکنڈ، مانسہرہ، ایبٹ آباد اور باجوڑ میں بھی بارش کا امکان ہے۔

محکمہ موسمیات کے مطابق گلگت بلتستان کے علاقے چلاس اور اس کے مضافات میں بارش جبکہ بالائی مقامات پر برفباری متوقع ہے۔ بابوسر، نانگا پربت اور دیگر بلند علاقوں میں بھی برفباری کی پیشگوئی کی گئی ہے۔

ادھر بلوچستان کے بیشتر اضلاع میں موسم خشک رہنے کا امکان ہے جبکہ سندھ کے زیادہ تر علاقوں میں موسم گرم اور خشک رہنے کی توقع ہے۔

محکمہ موسمیات نے خبردار کیا ہے کہ چلاس اور گردونواح میں بارشوں کے باعث شاہراہ قراقرم پر لینڈ سلائیڈنگ کا خدشہ ہے، جس کے پیش نظر مسافروں کو احتیاط برتنے کی ہدایت کی گئی ہے۔