موسمیاتی آفات سے نمٹنے کے لیے عالمی یکجہتی کو عملی اقدامات میں بدلنا ہوگا، وزیراعظم شہباز شریف

انطالیہ (صداے سچ نیوز) وزیراعظم محمد شہباز شریف نے کہا ہے کہ موسمیاتی تبدیلیوں کے اثرات سے نمٹنے کے لیے عالمی یکجہتی، منصفانہ اقدامات اور ترقی پذیر ممالک کو گرانٹ پر مبنی مالی معاونت فراہم کرنا ضروری ہے۔

کوپ 31 کے سربراہی اجلاس سے خطاب کرتے ہوئے وزیراعظم نے کہا کہ پاکستان موسمیاتی تبدیلیوں سے شدید متاثر ہونے والے ممالک میں شامل ہے۔ 2022 کے سیلاب سے ملک کا ایک تہائی حصہ زیر آب آیا، 3 کروڑ 30 لاکھ افراد متاثر ہوئے اور 30 ارب ڈالر سے زائد کا نقصان ہوا۔

انہوں نے کہا کہ موسمیاتی آفات سے متاثرہ ممالک کو ایسی مالی معاونت درکار ہے جس سے ان کے قرضوں میں اضافہ نہ ہو۔ موسمیاتی موافقت اور لچک کے فنڈز میں نمایاں اضافہ بھی ناگزیر ہے۔

وزیراعظم نے پاکستان کے صاف توانائی اقدامات کا ذکر کرتے ہوئے بتایا کہ دو سال میں شمسی توانائی کی صلاحیت میں 20 گیگاواٹ سے زیادہ اضافہ ہوا ہے جبکہ توانائی کے مجموعی ذرائع میں صاف توانائی کا حصہ تقریباً 55 فیصد ہے۔

انہوں نے زور دیا کہ پانی کو بطور ہتھیار استعمال نہیں کیا جانا چاہیے اور آبی معاہدوں پر ان کی حقیقی روح کے مطابق عملدرآمد ضروری ہے۔ ان کا کہنا تھا کہ کوپ 31 کی کامیابی کا اصل معیار عملی اقدامات اور متاثرہ خاندانوں کا تحفظ ہونا چاہیے۔