جاپان میں 5.7 شدت کا زلزلہ، 20 سے زائد افراد زخمی

ٹوکیو (صداۓ سچ نیوز) جاپان کے وسطی علاقوں میں 5.7 شدت کے زلزلے نے شہریوں میں خوف و ہراس پھیلا دیا، جس کے نتیجے میں کم از کم 20 افراد زخمی ہوگئے۔

زلزلے کے جھٹکوں سے دکانوں کے شیشے چکنا چور ہوگئے، عمارتوں میں رکھا سامان نیچے آ گرا جبکہ کئی مقامات پر ٹرینوں کی آمدورفت بھی متاثر ہوئی۔

جاپانی محکمہ موسمیات کے مطابق زلزلہ اتوار، 8 نومبر 2026ء کو مقامی وقت کے مطابق رات ایک بج کر 4 منٹ پر صوبہ شیزوکا کے مغربی حصے میں آیا۔ زلزلے کا مرکز زمین سے تقریباً 40 کلومیٹر گہرائی میں تھا۔

زلزلے کے شدید جھٹکے صوبہ آئچی کے شہر چیتا میں محسوس کیے گئے، جہاں جاپانی زلزلہ پیما پیمانے پر شدت 5 سے زیادہ ریکارڈ کی گئی۔ اس کے علاوہ شیزوکا، ناگانو اور گیفو کے مختلف علاقوں میں بھی زلزلے کے جھٹکے محسوس کیے گئے۔

حکام کے مطابق بیشتر افراد زلزلے کے جھٹکوں کے باعث گرنے، سیڑھیوں سے پھسلنے یا محفوظ مقامات کی جانب بھاگنے کے دوران زخمی ہوئے، جنہیں طبی امداد کے لیے اسپتال منتقل کردیا گیا۔