ہاؤ سنگ اتھارٹی کا اقساط جمع نہ کروانے والے الاٹیز کیخلاف بڑا ایکشن، مزید 13 پلاٹس کینسل

اسلام آباد (صدائے سچ نیوز) ہاؤ سنگ اتھارٹی کے ایگزیکٹو بورڈ کی ہدایات پر قائم خصوصی کمیٹی کی اسکرو ٹنی اور سفارشات کے بعد واجب الادا اقساط جمع نہ کروانے والے مزید تیرہ (13) الاٹیز کے پلاٹس فوری طور پر منسوخ کر دئیے گئے ہیں۔ اس سے قبل پہلے مرحلے میں سال 2016 سے مالی ذمہ داریاں پوری نہ کرنے والے نادہندگان کے خلاف سخت ایکشن لیتے ہوئے چھے پلاٹس کی الاٹمنٹ اور ممبرشپ منسوخ کی گئی تھی۔

جاری پریس ریلیز کے مطابق یہ فیصلہ مکمل شفافیت، میرٹ اور مروجہ قوانین کے مطابق کیا گیا ہے تاکہ منصوبے کی ترقی میں حائل مالی رکاوٹوں کو دور کیا جا سکے۔

ہاؤ سنگ اتھارٹی کی جانب سے تمام الاٹیز کو ایک بار پھر واضح الفاظ میں آگاہ کیا گیا ہے کہ خصوصی کمیٹی کی جانب سے ریکارڈ کی اسکرو ٹنی کاعمل مسلسل جاری ہے۔ ایسے تمام الاٹیز جو بار بار مواقع فراہم کیے جانے کے باوجود اپنی دیرینہ واجب الادا اقساط اور بقایا جات جمع نہیں کروا رہے، انہیں مطلع کیا جاتا ہے کہ اگر انہوں نے فوراً اپنی مالی ذمہ داریاں پوری نہ کیں تو ان کے پلاٹس بھی بغیر کسی مزید مہلت کے فوری طور پرکینسل کر دیے جائیں گے اور ان کے خلاف قانون کے مطابق کاروائی کی جائے گی۔

یہ بھی پڑھیں: ایف جی ای ہاوسنگ اتھارٹی کا بروقت اقساط نہ جمع کرانے پر پلاٹ کینسل کرنے کا فیصلہ

اتھارٹی کی قیادت اس عزم کا اعادہ کرتی ہے کہ سیکٹر F-14 اور F-15 کو جدید شہری تقاضوں کے مطابق ایک ماحول دوست پائیدار اور مثالی رہائشی منصوبہ بنایا جائے گا، جہاں شہریوں کو بہترین رہائشی سہولیات فراہم کی جائیں گی۔

فیڈرل گورنمنٹ ایمپلائیز ہاؤ سنگ اتھارٹی نے اس موقع پر ان تمام الاٹیز کا تہہ دل سے شکر یہ ادا کیا جنہوں نے اپنی واجب الادا اقساط بر وقت جمع کروائیں اور منصوبے کی ترقی میں بھر پور تعاون کیا۔

اتھارٹی اس عزم کا اعادہ کرتی ہے کہ تمام انتظامی و ترقیاتی امور میں شفافیت، میرٹ اور عوامی مفاد کو مقدم رکھا جائے گا اور سیکٹر F-14 اور F-15 کو جلد از جلد مکمل کر کے الاٹیز کے خوابوں کو حقیقت میں بدلا جائے گا۔