نیٹلی بیکر پاکستان میں امریکا کی نئی سفیر نامزد، سینیٹ کی منظوری کا انتظار

واشنگٹن (صدا ئے سچ نیوز) امریکی صدر ڈونلڈ ٹرمپ نے پاکستان میں امریکا کی نئی سفیر کے لیے موجودہ ناظم الامور نیٹلی بیکر کو نامزد کردیا ہے، تاہم ان کی باضابطہ تقرری امریکی سینیٹ کی توثیق سے مشروط ہوگی۔

وائٹ ہاؤس کے مطابق نیٹلی بیکر کی نامزدگی منظوری کے لیے امریکی سینیٹ کو ارسال کردی گئی ہے۔ سینیٹ کی جانب سے توثیق کے بعد وہ پاکستان میں امریکی سفیر کی حیثیت سے اپنی ذمہ داریاں سنبھالیں گی۔

نیٹلی بیکر جنوری 2025 سے اسلام آباد میں امریکی سفارت خانے کی ناظم الامور کے طور پر خدمات انجام دے رہی ہیں۔ اس عہدے پر تعیناتی سے قبل وہ قطر کے دارالحکومت دوحہ میں امریکی سفارت خانے کی ڈپٹی چیف آف مشن رہ چکی ہیں۔

ان کے تعلیمی پس منظر میں پرنسٹن یونیورسٹی سے بیچلرز کی ڈگری اور ہارورڈ یونیورسٹی کے کینیڈی اسکول آف گورنمنٹ سے پبلک پالیسی میں ماسٹرز کی ڈگری شامل ہے۔ وہ امریکی نیشنل ڈیفنس یونیورسٹی کے نیشنل وار کالج سے 2017 میں گریجویشن بھی کر چکی ہیں۔

نیٹلی بیکر کی نامزدگی پاکستان اور امریکا کے سفارتی تعلقات کے تناظر میں اہم پیش رفت ہے۔ سینیٹ کی منظوری کے بعد وہ باضابطہ طور پر اسلام آباد میں امریکی سفارتی مشن کی سربراہی سنبھالیں گی۔

واضح رہے کہ تاحال یہ نامزدگی ہے اور امریکی سینیٹ کی منظوری کے بعد ہی ان کی تقرری حتمی ہوگی۔