ہیپاٹائٹس سی کے خاتمے کے لیے ملک گیر اسکریننگ اور جامع حکمت عملی ضروری ہے، مصطفیٰ کمال

اسلام آباد (صداے سچ نیوز) وفاقی وزیر برائے صحت سید مصطفیٰ کمال نے پاکستان سے ہیپاٹائٹس سی کے مکمل خاتمے کے لیے ملک بھر میں اسکریننگ کے عمل کو مؤثر بنانے اور مربوط حکمت عملی اپنانے کی ضرورت پر زور دیا ہے۔ انہوں نے کہا کہ اس مرض کا پھیلاؤ ایک بڑا عوامی صحت کا چیلنج ہے اور خدشہ ہے کہ ملک میں لاکھوں افراد ہیپاٹائٹس سی سے متاثر ہیں۔

اپنے بیان میں انہوں نے کہا کہ ہیپاٹائٹس سی کے خاتمے کے لیے شروع کیے گئے قومی پروگرام کو کامیابی سے ہمکنار کرنے کے لیے اس پر مسلسل اور مؤثر انداز میں عملدرآمد ناگزیر ہے۔

وفاقی وزیر کے مطابق مریضوں کی بروقت تشخیص کے لیے باقاعدگی سے اسکریننگ، ادویات کی بلاتعطل فراہمی، معیاری تشخیصی سہولیات، تربیت یافتہ طبی عملے کی دستیابی اور نگرانی کا مؤثر نظام انتہائی اہمیت رکھتے ہیں۔

انہوں نے کہا کہ معاشرے کے کم آمدنی والے طبقات، بالخصوص یومیہ اجرت پر کام کرنے والے افراد جو مہنگے طبی ٹیسٹ کروانے کی استطاعت نہیں رکھتے، خصوصی توجہ کے مستحق ہیں۔ اسی طرح اپنے خاندان کی صحت کے حوالے سے فکرمند ماؤں اور طویل عرصے سے طبی معائنے سے گریز کرنے والے بزرگ شہریوں کے لیے مفت اسکریننگ اور علاج کی سہولیات انتہائی اہم ثابت ہو سکتی ہیں۔

انہوں نے مزید کہا کہ مفت تشخیص اور علاج کی فراہمی نہ صرف بیماری کی بروقت نشاندہی میں مددگار ثابت ہوگی بلکہ متاثرہ افراد کو طویل علالت سے بچانے اور صحت یابی کے امکانات بڑھانے میں بھی معاون ثابت ہوگی۔

وفاقی وزیر نے کہا کہ وزیراعظم کے قومی پروگرام برائے خاتمہ ہیپاٹائٹس سی پر مضبوط ادارہ جاتی عزم اور مستقل مزاجی کے ساتھ عملدرآمد کیا جائے تو یہ پاکستان کے شعبہ صحت میں ایک اہم اور دوررس نتائج کا حامل منصوبہ ثابت ہو سکتا ہے۔

ان کا کہنا تھا کہ اس پروگرام کے ذریعے قیمتی انسانی جانیں بچانے، غریب اور مستحق خاندانوں کو علاج معالجے کے بھاری اخراجات سے تحفظ فراہم کرنے اور پاکستان کو ہیپاٹائٹس سی سے پاک بنانے کے قومی ہدف کے حصول میں نمایاں پیش رفت ممکن ہے۔