نئی ٹیموں کی شمولیت سے پی ایس ایل کی آمدن میں نمایاں اضافہ، منافع 2 ارب سے بڑھ کر ساڑھے7 ارب روپے سے تجاوز کرگیا

کراچی (صدائے سچ نیوز) سینیٹر  رانا محمود الحسن کی زیرصدارت سینیٹ کی قائمہ کمیٹی برائے کابینہ سیکرٹریٹ کا اجلاس ہوا۔

اجلاس میں پی ایس ایل 2026 کے اخراجات، آمدن اور منافع کی تفصیلات پیش کی گئیں، پاکستان کرکٹ بورڈ کے حکام نے سینیٹ کمیٹی کابینہ کو تفصیلات پیش کیں۔

 پاکستان کرکٹ بورڈ کے حکام  نے بتایاکہ پی ایس ایل کی 2 نئی ٹیموں کی شمولیت کے بعد لیگ کی آمدن اور  منافع میں نمایاں اضافہ ریکارڈ کیا گیا، پی ایس ایل ٹیموں کی تعداد 8 ہونے سے منافع 2 ارب سے بڑھ کر ساڑھے7 ارب روپے سے تجاوز کرگیا۔

دستاویز کے مطابق پی ایس ایل 2026 پر مجموعی طور پر 2 ارب 64 کروڑ 54 لاکھ روپے سے زائد اخراجات  آئے، مجموعی آمدن 10 ارب 19 کروڑ 52 لاکھ روپے سے زائد رہی، پی ایس ایل 2026 سے پی سی بی کو ٹیکس سے قبل 7 ارب 54 کروڑ 98 لاکھ روپے سے زائد منافع ہوا۔

دستاویز کے مطابق  پی ایس ایل 2025 کے دوران پی سی بی کو تقریباً 2 ارب روپے منافع حاصل ہوا، پی ایس ایل 2024 کے دوران پی سی بی کا منافع 2 ارب 46 کروڑ روپے تھا۔