افغان طالبان نے ملک بھر میں مظاہروں پر مکمل پابندی لگادی

کابل (صداۓ سچ نیوز) افغانستان میں طالبان رجیم نے مظاہروں  پر مکمل پابندی لگا دی۔

افغان میڈیا کے مطابق طالبان کے سپریم لیڈر ہیبت اللہ اخوندزادہ نے نئی قانون شرطہ (پولیس قانون) کی منظوری دی ہے جس کے تحت افغانستان بھر میں ہر قسم کے مظاہروں پر پابندی ہوگی۔

افغان وزارت انصاف کی جانب سے آج باقاعدہ قانون شرطہ جاری کیا گیا ہے جس میں پولیس کے مختلف شعبوں میں فرائض اور ذمہ داریوں کا تعین کیا گیا ہے۔

افغان میڈیا کے مطابق قانون شرطہ کی شق 50 میں واضح طور پر کہا گیا ہے کہ افغانستان کی سرزمین پر کسی بھی قسم کا مظاہرہ ممنوع ہے۔

خیال رہے کہ افغان طالبان نے حال ہی میں اپنی پولیس فورس کا نام تبدیل کرکے ’شرطہ‘ رکھا ہے۔

پولیس قانون میں کہا گیا ہے کہ پولیس اہلکار گرفتاری کے دوران ایسے اقدامات سے گریز کریں گے جن سے زیر حراست افراد یا ملزمان کی جسمانی صحت یا عزت نفس کو نقصان پہنچنے کا خدشہ ہو۔

قانون کے تحت کسی بھی قیدی یا ملزم کو عدالتی حکم کے بغیر لاٹھی، کوڑے یا کیبل سے مارنے یا کسی بھی دوسرے طریقے سے تشدد کا نشانہ بنانے کی اجازت نہیں ہوگی۔