سالانہ بین الاقوامی معصومہء سندھ امن و بین المذاہب ہم آہنگی کانفرنس 23 دسمبر کو کراچی میں منعقد ہوگی

کراچی (صدائے سچ نیوز) بین الاقوامی سالانہ معصومہء سندھ امن و بین المذاہب ہم آہنگی کانفرنس منگل 23 دسمبر 2025 کو دوپہر 2:30 بجے سندھ بوائز اسکاؤٹس آڈیٹوریم کراچی میں منعقد ہوگی۔

کانفرنس میں مختلف مذاہب سے تعلق رکھنے والے ممتاز علماء اور اسکالرز امن، رواداری اور باہمی احترام کے موضوعات پر خطاب کریں گے۔

کانفرنس میں سندھ کے معروف دانشور اور مصنف زوار عبدالستار درس (176 کتب کے مصنف) خصوصی شرکت کریں گے۔ ان کے ہمراہ نیاز حسین لغاری، چیئرمین زائرین خدمت کمیٹی روضۂ معصومۂ سندھ بھی شریک ہوں گے۔

یہ سالانہ اجتماع سیدہ خدیجہ بی بی ماہَم (س) بنت امام موسیٰ کاظم (ع) سے منسوب روحانی ورثے کے حوالے سے منعقد کیا جا رہا ہے۔

تقریب کی صدارت سینئر صحافی و مصنف نذیر لغاری کریں گے۔ اس موقعہ پر دو کتب کی رونمائی بھی ہوگی، جن میں زوار عبدالستار درس کی راجہ ڈاہر پر تصنیف اور نذیر لغاری کی ایران پر تصنیف شامل ہیں

وزیراعلیٰ سندھ نے کانفرنس کے موقعہ پر اپنے خصوصی پیغام میں کہا ہے کہ انہیں بین الاقوامی سالانہ معصومۂ سندھ امن و بین المذاہب ہم آہنگی کانفرنس 2025 پر دلی مبارکباد پیش کرتے ہوئے مسرت محسوس ہو رہی ہے۔

انہوں نے کہا کہ یہ اہم اجتماع سندھ کی اس صدیوں پرانی روایت کا عکاس ہے جس کی بنیاد امن، رواداری، شمولیت اور باہمی احترام پر رکھی گئی ہے۔

وزیراعلیٰ سندھ نے کہا کہ سیدہ خدیجہ بی بی ماہَم (س) بنت امام موسیٰ کاظم (ع) کے نام سے منسوب یہ کانفرنس اہلِ بیتؑ کی تعلیمات، رحمتوں، انکساری اور خدمتِ انسانیت کے جذبے کو اجاگر کرتی ہے۔

ان کے مطابق آج کے دور میں جب دنیا کو تقسیم اور بے چینی کا سامنا ہے، معصومۂ سندھ کانفرنس جیسے اقدامات مکالمے اور اتحاد، مشترکہ ذمہ داری کو فروغ دینے میں کلیدی کردار ادا کرتے ہیں۔

وزیراعلیٰ سندھ نے منتظمین کی کاوشوں کو سراہتے ہوئے امید ظاہر کی کہ یہ کانفرنس بامقصد مکالمے کو فروغ دے گی اور ایک زیادہ پرامن، باہم جڑی ہوئی اور ہمدرد معاشرت کے قیام میں مددگار ثابت ہوگی۔