ایف آئی اے کی جعلی اور اسمگل شدہ ادویات کے خلاف کارروائی، بڑی مقدار میں ممنوعہ ادویات برآمد

کوئٹہ (صدائے سچ نیوز) فیڈرل انویسٹی گیشن ایجنسی (ایف آئی اے) کے اینٹی کرپشن سرکل کوئٹہ نے جعلی اور اسمگل شدہ ادویات کے غیر قانونی کاروبار کے خلاف ایک کامیاب کارروائی کرتے ہوئے بڑی مقدار میں ممنوعہ ادویات برآمد کر لی ہیں۔ یہ کارروائی علاقے میں غیر معیاری اور غیر رجسٹرڈ ادویات کی روک تھام کے سلسلے میں کی گئی۔

کارروائی کے دوران ملزم محمد وسیم ولد عبدالحکیم کو گرفتار کر لیا گیا۔ ملزم کے قبضے سے بھارتی ساختہ ادویات کی بھاری مقدار برآمد ہوئی جو بظاہر اسمگل شدہ اور غیر رجسٹرڈ ہیں۔

جعلی ادویات انسانی صحت کے لیے انتہائی خطرناک ثابت ہو سکتی ہیں۔ برآمد شدہ ادویات کی مالیت تقریباً 25 لاکھ روپے بتائی جا رہی ہے۔

کارروائی کے بارے میں میڈیا کو بریفنگ دیتے ہوئے فضل الرحمان کاکڑ، ڈپٹی ڈائریکٹر اینٹی کرپشن سرکل کوئٹہ نے بتایا کہ ایف آئی اے نے اس نیٹ ورک کے دیگر عناصر کا پتہ لگانے کے لیے مزید تحقیقات کا آغاز کر دیا ہے اور قانون کے مطابق سخت کارروائی عمل میں لائی جائے گی۔

ایف آئی اے عوام کی صحت کے تحفظ اور غیر قانونی سرگرمیوں کے خاتمے کے لیے پرعزم ہے۔