کسی بھی بھارتی جارحیت کا منہ توڑ جواب دیا جائے گا، طالبان رجیم کے بعد دہشتگردی میں اضافہ ہوا، دفترخارجہ

اسلام آباد (صداۓ سچ نیوز) ترجمان دفتر خارجہ طاہر حسین اندرابی نے کہا ہے کہ کسی بھی بھارتی جارحیت کا منہ توڑ جواب دیا جائے گا۔ جبکہ طالبان رجیم کے بعد سے دہشت گردی میں اضافہ ہوا ہے۔

ترجمان دفتر خارجہ طاہر حسین اندرابی نے ہفتہ وار بریفنگ میں اہم خارجہ و سلامتی امور پر پاکستان کا مؤقف واضح کر دیا۔ انہوں نے کہا کہ ہماری مسلح افواج ملک کے دفاع کے لیے پرعزم ہیں۔ اور پاکستان اپنی سرزمین کی سلامتی کے لیے تمام ضروری اقدامات کرے گا۔

انہوں نے کہا کہ افغانستان کی جانب سے حالیہ بیانات افسوسناک ہیں۔ جبکہ کابل حکومت اپنی سرزمین پر دہشتگردوں کے خاتمے کو یقینی بنائے۔ طالبان رجیم کے قیام کے بعد دہشتگردی کے واقعات میں اضافہ ہوا ہے۔ اور پاکستان افغانستان کی سرزمین سے لاحق خطرات سے آگاہ ہے۔

بھارت سے متعلق گفتگو کرتے ہوئے ترجمان نے کہا کہ پاکستان کسی بھی بھارتی جارحیت کا منہ توڑ جواب دینے کی مکمل صلاحیت رکھتا ہے۔ آپریشن سوفٹ ریٹارٹ ملکی تاریخ کا اہم اور عسکری دنیا کا تاریخی واقعہ ہے۔ 27 فروری اس آپریشن کی یاد کا دن ہے۔

انسانی حقوق کے حوالے سے ترجمان نے بتایا کہ پاکستان عالمی انسانی حقوق تنظیموں کا حصہ ہے۔ اور ملک میں انسانی حقوق کے تحفظ کے لیے فعال طریقہ کار موجود ہے۔

سفارتی سرگرمیوں پر روشنی ڈالتے ہوئے طاہر حسین اندرابی نے کہا کہ وزیر اعظم شہباز شریف نے امیر قطر کی دعوت پر دوحہ کا دورہ کیا۔ جہاں باہمی دلچسپی کے شعبوں خصوصاً دفاعی تعاون میں روابط بڑھانے پر اتفاق ہوا۔ امیر قطر نے دورہ پاکستان کی دعوت بھی قبول کر لی۔ اس موقع پر وزیر خارجہ اسحاق ڈار بھی وزیر اعظم کے ہمراہ تھے۔

انہوں نے کہا کہ وزیر خارجہ اسحاق ڈار جدہ میں منعقد ہونے والے او آئی سی ایگزیکٹو کمیٹی کے اجلاس میں شرکت کریں گے۔ جہاں اسرائیلی بستیوں کی غیرقانونی توسیع اور مقبوضہ مغربی کنارے کی صورتحال کا جائزہ لیا جائے گا۔ وہ مختلف ممالک کے وزرائے خارجہ سے ملاقاتیں بھی کریں گے اور مکہ مکرمہ اور مدینہ منورہ میں حاضری بھی دیں گے۔

ترجمان نے کہا کہ پاکستان خطے میں امن، خودمختاری اور بین الاقوامی قوانین کے احترام کے اصولوں پر قائم ہے۔