پرائس کنٹرول مجسٹریٹ کی بروقت کاروائی، فتح جنگ میں مردہ مرغیوں کی بڑی اسمگلنگ ناکام

فتح جنگ (صدائے سچ نیوز) پرائس کنٹرول مجسٹریٹ چوہدری شفقت محمود کی عوامی صحت کے تحفظ کے لیے بڑی کارروائی ، مردہ مرغیوں کی اسمگلنگ ناکام بنا دی۔

تفصیلات کے مطابق پرائس کنٹرول مجسٹریٹ چوہدری شفقت محمود حسبِ معمول رات گئے گشت اور مختلف چیک پوسٹوں کی نگرانی کر رہے تھے۔ اسی دوران انہیں تین مشکوک سوزوکی گاڑیاں نظر آئیں جنہیں روک کر تلاشی لی گئی۔

ابتدائی پوچھ گچھ میں گاڑیوں میں سوار افراد نے بتایا کہ وہ مردہ مرغے روات فیکٹری لے جا رہے ہیں، تاہم وہ تسلی بخش جواب نہ دے سکے۔ بعد ازاں انہوں نے انکشاف کیا کہ وہ مزدور ہیں اور ایک ہزار روپے یومیہ اجرت پر مالکان کے کہنے پر یہ مال منتقل کر رہے تھے۔

مزید یہ کہ تینوں سوزوکی گاڑیاں فتح جنگ چوکی کے قریب کھڑی کر دی گئیں، گاڑیوں سے اٹھنے والا شدید تعفن نے قریب سے گزرنا بھی دشوار بنادیا تھا۔ مجموعی طور پر تقریباً 110 من مردہ مرغیاں لوڈ تھیں، جو مبینہ طور پر 500 روپے فی من کے حساب سے خریدی گئیں اور 900 روپے فی من فروخت کی جانی تھیں۔

ذرائع کے مطابق خدشہ ظاہر کیا جا رہا ہے کہ یہ مردہ گوشت مختلف ہوٹلوں، شادی ہالز، پیزا اور شوارما سینٹرز تک سپلائی کیا جانا تھا، تاہم اس حوالے سے مزید تفتیش جاری ہے اور اہم انکشافات کی توقع کی جا رہی ہے۔

اس بروقت کارروائی پر سردار موارہن خان (ڈی پی او اٹک) نے چوہدری شفقت محمود کو خراجِ تحسین پیش کیا اور ان کی پیشہ ورانہ صلاحیتوں کو سراہا۔

عوامی حلقوں نے بھی چوہدری شفقت محمود کے اس اقدام کو سراہااور اس کارروائی کو صحتِ عامہ کے تحفظ کے لیے نہایت اہم قرار دیا۔