وزیر اعظم کی ایران میں پھنسے پاکستانیوں کو بحفاظت واپس لانے کی ہدایت

اسلام آباد (صداۓ سچ نیوز) وزیر اعظم شہباز شریف نے ایران میں پھنسے پاکستانیوں کو بحفاظت وطن واپس لانے کی ہدایت کر دی۔

وزیر اعظم شہباز شریف کی زیر صدارت ملک میں مجموعی سیکیورٹی صورتحال پر اعلیٰ سطحی اجلاس ہوا۔ اجلاس میں وفاقی اور صوبائی سطح کے تمام متعلقہ اداروں کو موجودہ صورتحال کے پیش نظر جامع اور مؤثر حفاظتی اقدامات یقینی بنانے کی ہدایات دی گئیں۔

شہباز شریف نے تمام اداروں کو تاکید کی کہ وہ باہمی رابطے اور مکمل ہم آہنگی کے ساتھ اپنی ذمہ داریاں انجام دیں۔

بریفنگ میں بتایا گیا کہ تمام سیکیورٹی ادارے الرٹ ہیں اور ملکی سلامتی کے تحفظ کے لیے ضروری اقدامات بروئے کار لائے جا رہے ہیں۔

وزیر اعظم نے وزارت خارجہ کو ہدایت کی کہ فوری اقدامات کیے جائیں اور پاکستانیوں کو آذربائیجان کے راستے بحفاظت وطن واپس لایا جائے۔ اس سلسلے میں وزارت خارجہ کو آذربائیجان کی حکومت سے فوری رابطے کا بھی حکم دیا گیا۔

شہباز شریف نے کہا کہ پاکستان کی عوام اور مسلح افواج ملک کی سلامتی، خودمختاری اور علاقائی سالمیت کے تحفظ کے لیے ہر وقت تیار ہیں۔ فیلڈ مارشل سید عاصم منیر کی قیادت میں افواج پاکستان قومی جذبے کے ساتھ بہترین انداز میں اپنے فرائض سر انجام دے رہی ہیں۔

وزیر اعظم نے دہشت گردی کے خلاف جنگ میں سیکیورٹی فورسز کی قربانیوں کو سراہا اور کہا کہ پوری قوم انہیں سلام پیش کرتی ہے۔