نایاب فلکیاتی منظر: 6 سیارے ایک ساتھ دیکھنے کا بہترین موقع

فلکیات (صداۓ سچ نیوز) فلکیات کے شوقین افراد کے لیے فروری کا مہینہ ایک نادر اور یادگار فلکیاتی منظر پیش کرے گا، کیونکہ اس دوران آسمان پر ایک ساتھ 6 سیارے دیکھنے کا موقع ملے گا۔

بین الاقوامی ذرائع کے مطابق فلکیات میں اس منفرد منظر کو پلانیٹ پریڈ کہا جاتا ہے، جب نظام شمسی کے کئی سیارے مخصوص ترتیب میں آسمان پر نمودار ہوتے ہیں۔

ماہرین فلکیات کے مطابق فروری میں رات کے وقت آسمان پر عطارد، زہرہ، زحل، مشتری، یورینس اور نیپچون واضح طور پر نظر آئیں گے۔ اس فلکیاتی پریڈ میں صرف مریخ شامل نہیں ہوگا، جبکہ باقی چھ سیارے چند دنوں تک مختلف زاویوں سے دیکھے جا سکیں گے۔ شمالی نصف کرہ میں اس نظارے کا بہترین وقت فروری کے آخری ہفتے کے دوران متوقع ہے۔

زیادہ تر سیارے سورج غروب ہونے سے پہلے دکھائی دیں گے، اس لیے ٹیلی اسکوپ کے ذریعے مشاہدہ آسان ہوگا۔ عطارد اور زہرہ صرف 30 سے 45 منٹ کے لیے نظر آئیں گے، جبکہ زحل اور نیپچون ایک ساتھ دکھائی دیں گے۔ مشتری اور یورینس کافی دیر تک آسمان پر موجود رہیں گے۔

یہ پلانیٹ پریڈ دنیا کے مختلف حصوں سے دیکھی جا سکتی ہے، مگر مقامی وقت اور زاویے مختلف ہونے کی وجہ سے آن لائن فلکیاتی سروسز سے صحیح وقت معلوم کرنا ضروری ہے۔

ماہرین کے مطابق 2026 میں مجموعی طور پر تین پلانیٹ پریڈز متوقع ہیں: فروری میں چھ، اپریل میں پانچ اور اگست میں دوبارہ چھ سیارے۔ یہ نایاب مناظر نہ صرف سائنسی دلچسپی بڑھاتے ہیں بلکہ عام لوگوں میں کائنات کے بارے میں تجسس اور شعور بھی فروغ دیتے ہیں۔