حماس کے مکمل غیر مسلح ہونے تک اسرائیل غزہ سے نہیں نکلے گا، ڈائریکٹر بورڈ آف پیس

واشنگٹن (صداۓ سچ نیوز) امریکی قیادت میں قائم بورڈ آف پیس کے ڈائریکٹر نکولے ملاڈینوف نے کہا ہے کہ اسرائیلی افواج کا غزہ سے انخلاء اس وقت تک نہیں ہو گا جب تک حماس کو مکمل طور پر غیر مسلح نہیں کر دیا جاتا۔

یہ بیان بورڈ آف پیس کے ڈائریکٹر نکولے ملاڈینوف اور اسرائیلی وزیرِ اعظم بنیامین نیتن یاہو کے درمیان ہونے والی ملاقات کے بعد سامنے آیا ہے۔

گزشتہ روز مغربی یروشلم میں ہونے والی اس ملاقات میں اسرائیلی سیاست دانوں نے امریکی صدر کی جانب سے اعلان کردہ امن معاہدے پر اپنے تحفظات کا اظہار بھی کیا۔

بورڈ آف پیس کا کہنا ہے کہ غلط رپورٹس کے بر عکس، ہم واضح کرتے ہیں کہ اسرائیلی فوج کا غزہ سے انخلاء صرف اس وقت ہو گا جب حماس مکمل طور پر غیر مسلح ہو جائے، انہیں ناصرف ہلکے اور بھاری ہتھیار بلکہ ان کی بنائی گئی سرنگیں بھی چھوڑنی ہوں گی۔

بورڈ آف پیس نے ملاقات کے بعد سوشل میڈیا پر جاری کیے گئے بیان میں کہا ہے کہ ہدف واضح ہے اور اس پر کوئی ابہام نہیں، غزہ کی پٹی میں تمام ہتھیاروں کا مکمل خاتمہ اور شہری طرزِ حکمرانی کی جانب منتقلی ناگزیر ہے۔

دوسری جانب حماس نے مؤقف اختیار کیا ہے کہ جب تک اسرائیل معاہدے کے تحت اپنی ذمے داریاں پوری نہیں کرتا، اس معاہدے پر عمل درآمد ممکن نہیں ہو گا۔

خبر رساں ادارے کے مطابق ملاقات سے باخبر 2 افراد نے بتایا ہے کہ نکولے ملاڈینوف نے نیتن یاہو پر زور دیا کہ وہ غزہ پر حملے بند کریں۔

دوسری جانب اسرائیل نے اکتوبر 2025ء میں ہونے والی جنگ بندی کے باوجود حملے جاری رکھے ہیں۔

اس عرصے کے دوران اسرائیلی کارروائیوں میں 1,200 سے زائد فلسطینی شہید ہوئے، جن میں غیر مسلح کرنے کے معاہدے کے اعلان کے بعد شہید ہونے والے 36 سے زائد افراد بھی شامل ہیں۔

رپورٹ کے مطابق اکتوبر 2023 میں شروع ہونے والی جنگ کے بعد سے غزہ میں اسرائیلی حملوں میں 73 ہزار سے زائد فلسطینی شہید ہو چکے ہیں۔