رئیسہ عادل نئی پرنسپل انفارمیشن آفیسر، مبشر حسن ڈی جی ڈیجیٹل کمیونیکیشن ڈیپارٹمنٹ تعینات

اسلام آباد(صدائے سچ نیوز) وفاقی حکومت نے انفار میشن گروپ کے گریڈ 20کے افسران رئیسہ عادل کو پرنسپل انفارمیشن آفیسر جبکہ مبشر حسن کو ڈائریکٹر جنرل ڈیجیٹل کمیونیکیشن ڈیپارٹمنٹ کے عہدوں پر تعینات کر دیا۔ جبکہ محمد شہزاد کو بطور ڈائریکٹر جنرل پریس انفارمیشن ڈیپارٹمنٹ ذمہ داریاں سنبھالنے کی ہدایت کی گئی ہے۔

کچھ عرصہ قبل سابق پرنسپل انفارمیشن آفیسر پریس انفارمیشن ڈیپارٹمنٹ مبشر حسن کی جانب سے مسلسل ورک لوڈ کے باعث صحت کی خرابی کے بعد بطور پرنسپل انفارمیشن آفیسر خدمات جاری رکھنے سے معذوری ظاہرکی تھی جس پر وزارت اطلاعات و نشریات کی جانب سے تجویز کردہ دوافسران شفقت عباس اور رئیسہ عادل کا وزیراعظم پاکستان میاں محمد شہباز شریف نے انٹرویو کیا۔

شفقت عباس کا شمار میڈیا کے مقبول ترین افسران میں ہوتا ہے اور وہ اپنے کیرئیر کے دوران وزیر اعظم سیکرٹریٹ سمیت مختلف اہم عہدوں پر کامیابی سے خدمات سرانجام دیتے رہے ہیں۔ ان کے رپورٹرز سے لیکر ٹی وی مالکان اور میڈیا تنظیموں کے عہدے داروں کیساتھ گہرے مراسم ہیں، وزارت اطلاعات اور میڈیا حلقوں میں رحم دل افسر کے طور پر جانے جاتے ہیں۔

پینل میں شامل دوسری افسر رئیسہ عادل ڈائریکٹر اے بی سی ، ڈائریکٹر پی آئی ڈی کراچی اور ڈائریکٹر جنرل ایکسٹرنل پبلسٹی ونگ سمیت دیگر عہدوں پر خدمات کا تجربہ رکھتی ہیں۔ پاکستان میں حالیہ ایران امریکہ مذاکرات کے دوران انٹرنیشنل میڈیا کو ہینڈل کرنے کے حوالے سے ان کی صلاحیتیں کھل کر سامنے آئیں ۔انفارمیشن گروپ کی محنتی اور قابل افسر ہیں۔

علاوہ ازیں لندن میں پاکستانی سفارتخانے میں بطور پریس منسٹر خدمات سرانجام دینے والے انفارمیشن گروپ کے گریڈ 20کے افسر علی نواز ملک سے بھی حکومت کی طرف سے پرنسپل انفارمیشن افسر کی پوسٹ کیلئے انٹرویو کیلئے رابطہ کیا گیا لیکن انہوں نے بچوں کی جاری تعلیم کے باعث اس عہدے کے حوالے سے معذوری ظاہر کی۔ علی نواز ملک اس سے قبل سیکرٹری اطلاعات پنجاب سمیت اہم حکومتی عہدوں پر کامیاب انفارمیشن افسر کے طور پر کام کر چکے ہیں۔ پاکستان کے اندر اور میڈیا حلقوں میں ان کے بے پناہ تعلقات ہیں، اب موجودہ سیاسی حالات کے باوجود برطانیہ میں حکومت اور ریاست پاکستان کا بیانیہ کامیابی سے اجاگر کر رہے ہیں۔

سابق پی آئی او مبشر حسن نے بطور پی آئی اونہ صرف میڈیا میں بھی بے پناہ عزت اور محبت کمائی بلکہ حکومت نے بھی انہیں بہترین خدمات کی بدولت ستارہ امتیاز سمیت کئی اعزازات سے نوازا ہے۔ ان کے دور میں پی آئی او آفس کے دروازے ہر وقت میڈیا کیلئے کھلے رہتے تھے اور وہ ہمہ وقت تمام میڈیا سے رابطے میں رہتے تھے۔ انہوں نے صحیح معنوںمیں حکومت اور میڈیا کے درمیان پل کا کردار ادا کیا۔

نئی تقرریوں کے حوالے سے نوٹیفیکیشنز جاری کر دئیے گئے ہیں ۔