یومِ دفاع کے موقع پر اسلام آباد میں شاندار گرلز ہاکی نمائشی میچ، وزیراعظم یوتھ 11 کامیاب

اسلام آباد (صداۓ سچ نیوز) یومِ دفاعِ پاکستان کے موقع پر اسلام آباد ہاکی ایسوسی ایشن کے زیرِ اہتمام اور پرائم منسٹر یوتھ پروگرام کے تعاون سے ایک شاندار نمائشی گرلز ہاکی میچ کا انعقاد کیا گیا، جس میں پرائم منسٹر یوتھ 11 اور اسلام آباد اسپورٹس بورڈ 11 کی ٹیمیں مدمقابل ہوئیں۔

میچ کے مہمانِ خصوصی رانا مشہود احمد خان، چیئرمین پرائم منسٹر یوتھ پروگرام اور محی الدین احمد وانی، صدر پاکستان ہاکی فیڈریشن تھے۔ دونوں معزز مہمانوں نے میچ میں خصوصی شرکت کی، کھلاڑیوں کی حوصلہ افزائی کی اور اسلام آباد میں خواتین ہاکی کے فروغ کے لیے جاری سرگرمیوں کو سراہا۔

اس شاندار ایونٹ کے انعقاد میں سید ذیشان علی نقوی، ترجمان پرائم منسٹر یوتھ پروگرام اور پیٹرن اِن چیف اسلام آباد ہاکی ایسوسی ایشن، کا کلیدی کردار رہا۔ ان کے تعاون سے یومِ دفاع کے حوالے سے یہ ہاکی میلہ سجایا گیا، جس کا بنیادی مقصد اسلام آباد میں ہاکی کو فروغ دینا، گراؤنڈ لیول پر حقیقی معنوں میں کام کرنے والے کھلاڑیوں، کوچز اور ہاکی اکیڈمیوں کو نمایاں کرنا اور ہاکی کے فروغ کے لیے دیگر اداروں کی توجہ اور تعاون حاصل کرنا تھا۔

ایونٹ کے انعقاد میں مرزا نوید احمد، کانگریس ممبر پاکستان ہاکی فیڈریشن، اور سید سلیم رضا، فنانس سیکرٹری اسلام آباد ہاکی ایسوسی ایشن سمیت اسلام آباد ہاکی ایسوسی ایشن کے دیگر عہدیداران اور اراکین نے اہم کردار ادا کیا۔

اسلام آباد ہاکی ایسوسی ایشن کی وومن ونگ کی صدر محترمہ عمارا اویس نیازی اور سینئر وائس پریذیڈنٹ سادیہ قمر اور سید ضیاء بخاری نے بھی ایونٹ میں خصوصی خدمات انجام دیں۔ انتظامی اور گراؤنڈ سپروژن کے حوالے سے میڈم رفعت مسعود صاحبہ، عظیم احمد، یاسر اور بینش کی کاوشیں بھی نمایاں رہیں۔

نمائشی میچ میں پرائم منسٹر یوتھ 11 نے اسلام آباد اسپورٹس بورڈ 11 کو 1-0 سے شکست دے کر کامیابی حاصل کی۔ میچ انتہائی پُرجوش اور خوشگوار ماحول میں کھیلا گیا، جبکہ شائقین اور ہاکی سے وابستہ شخصیات نے کھلاڑیوں کو بھرپور داد دی۔

ایونٹ میں اسلام آباد کی مختلف گرلز ہاکی اکیڈمیوں اور کلبوں، بالخصوص اسلام آباد گرلز ہاکی اکیڈمیز، ہدف ہاکی کلب اینڈ اکیڈمی، راجہ عبدالقادر ہاکی کلب اینڈ اکیڈمی اور رائزنگ اسٹار ہاکی کلب اینڈ اکیڈمی سے وابستہ کھلاڑیوں نے بھرپور شرکت کی۔

اختتامی تقریب میں دونوں ٹیموں کے کھلاڑیوں اور آفیشلز میں ٹرافیز، میڈلز، شیلڈز اور سرٹیفکیٹس تقسیم کیے گئے۔ مہمانِ خصوصی رانا مشہود احمد خان اور صدر پاکستان ہاکی فیڈریشن محی الدین احمد وانی نے کھلاڑیوں میں انعامات تقسیم کرتے ہوئے ان کے مستقبل کے لیے نیک خواہشات کا اظہار کیا۔

اسلام آباد ہاکی ایسوسی ایشن کے عہدیداران نے اس عزم کا اظہار کیا کہ اسلام آباد میں گرلز ہاکی سمیت گراس روٹ لیول پر ہاکی کے فروغ کے لیے مزید ایسے ایونٹس منعقد کیے جائیں گے تاکہ نوجوان کھلاڑیوں کو بہتر مواقع، پلیٹ فارم اور قومی سطح تک پہنچنے کا راستہ فراہم کیا جا سکے