تیل کی قیمتیں 83 ڈالرز فی بیرل سے تجاوز کر گئیں

عالمی منڈی میں خام تیل کی قیمتوں میں اضافے کا سلسلہ جاری ہے۔

برینٹ کروڈ فیوچرز کی قیمت 1.1 فیصد اضافے کے بعد 83.48 ڈالرز فی بیرل تک پہنچ گئی۔

ادھر امریکی ویسٹ ٹیکساس انٹرمیڈیٹ (ڈبلیو ٹی آئی) خام تیل کی قیمت بھی 85 سینٹ اضافے کے بعد 78.84 ڈالرز فی بیرل ہو گئی۔

عالمی منڈی میں تیل کی قیمتوں میں یہ اضافہ آبنائے ہرمز میں بحری آمد و رفت سے متعلق بڑھتی ہوئی کشیدگی کے باعث ہوا ہے۔

عالمی منڈی میں تیل کی قیمتوں میں اضافہ ایک بڑی تبدیلی ہے، کیونکہ اس سے قبل تاجروں نے کشیدگی میں کمی کے امکان کو مدِنظر رکھتے ہوئے قیمتوں میں کمی کا اندازہ لگایا تھا۔

رواں ہفتے کے آغاز میں ایران اور عمان کے درمیان ممکنہ معاہدے کی امید پر خام تیل کی قیمتیں کم ہوئی تھیں، جس کے بعد آبنائے ہرمز کی بحالی کا امکان ظاہر کیا جا رہا تھا، تاہم تہران نے عمان کے ساتھ مل کر تجویز دی ہے کہ دشمن ممالک سے تعلق رکھنے والے بحری جہازوں کے آبنائے ہرمز سے گزرنے پر پابندی عائد کی جائے، جبکہ اس تجویز کی خلاف ورزی کرنے والے جہازوں پر بھاری جرمانے بھی عائد کیے جائیں۔