یومِ جمہوریہ ترکیہ کے موقع پر یونیورسٹی آف سرگودھا میں پرچم کشائی اور سیمینار کا انعقاد

سرگودھا (صدائے سچ نیوز) یوم جمہوریہ ترکیہ کے موقع پر یونیورسٹی آف سرگودھا میں ریاض شاد ہم نصابی فورم کے زیر اہتمام وائس چانسلر آفس کے گراؤنڈ میں پرچم کشائی کی تقریب منعقد ہوئی۔

تقریب میں برادر اسلامی ملک ترکیہ کا جھنڈا یونیورسٹی میں لہرایا گیا اور دونوں ملکوں کی مضبوط دوستی اور سلامتی کے لئے خصوصی دعا بھی کی گئی۔

پرچم کشائی کی تقریب سے خطاب کرتے ہوئے پرو وائس چانسلر یونیورسٹی آف سرگودھا پروفیسر ڈاکٹر مسعود سرور اعوان نے کہا کہ ترکیہ پاکستان کا ایک دیرینہ اور مخلص دوست ہے جس نے تجارت، سفارت کاری اور ہر مشکل گھڑی میں بھرپور ساتھ دیا اور عالمی سطح پر ہر فورم پر پاکستان کی حمایت کی۔

انہوں نے کہا کہ حال ہی میں معرکہ حق بنیان مرصوص میں دو ممالک چین اور برادر اسلامی ملک ترکیہ نے پاکستان کا بھرپور ساتھ دیا جس کے باعث ہم پوری دنیا میں سرخرو ہوئے اور عالمی طاقتیں آج پاکستان کی بہادری اور شجاعت کی مثالیں دے رہی ہیں۔

انہوں نے مزید کہا کہ تعلیم و تحقیق میں بھی برادر اسلامی ملک ترکیہ ہمارے ساتھ بہت سے اہم معاہدات کررہا ہے جن میں جامعات میں داخلے، ٹیکنیکل ایجوکیشن اور طالب علموں کے تبادلے کے حوالے سے خصوصی اقدامات شامل ہیں۔

پرچم کشائی کی تقریب سے خطاب کرتے ہوئے ڈائریکٹر ریاض شاد ہم نصابی فورم ڈاکٹر منیر گجر نے کہا کہ سرگودھا یونیورسٹی ترکیہ کو اس کے یوم جمہوریہ کے موقع پر خصوصی مبارک باد پیش کرتی ہے اور آنے والے دنوں میں یہ دوستی مزید مضبوط اور پائیدار ہوگی۔

تقریب کے اختتام پر پرنسل کالج آف ایگری کلچر پروفیسر ڈاکٹر اعجاز رسول نورکا نے دونوں ملکوں کی سلامتی کے لئے خصوصی دعا بھی کرائی۔

اس موقع پر ڈائریکٹر سٹوڈنٹس افیئرز ڈاکٹر محمود الحسن، منیجر فسیلی ٹیشن سنٹر ڈاکٹر بلال احمد، انچارج انکیوبیشن سنٹر سلمان احمد پراچہ، ڈپٹی رجسٹرار دفتر وائس چانسلر عبدالخالق بالی، سیکرٹری وائس چانسلر محمد احمد، انچارج تعلقات عامہ محمد عثمان، اسسٹنٹ رجسٹرار سید عابد حسین شاہ بھی موجود تھے۔

بعد ازاں ریاض شاد ہم نصابی فورم کے زیر اہتمام ترکیہ کے یوم جمہوریہ کے حوالے سے سیمینار کا انعقاد کیا گیا جس میں پاکستان اور ترکیہ کے برادرانہ تعلقات پر مفصل گفتگو کی گئی۔ یہ سیمینار ترکیہ کے یوم جمہوریہ کے سلسلے میں جاری ہفت روزہ تقریبات کا حصہ ہے۔

یونیورسٹی ریڈیو پر منعقدہ اس سیمینا میں چیئرمین شعبہ تاریخ و مطالعہ پاکستان ڈاکٹر محمد ابرار ظہور، چیئرپرسن شعبہ سیاسیات ڈاکٹر آسیہ سیف علوی، لیکچرر عبدالوہاب اور حافظ محمد عمر نے شرکت کی پروگرام کے میزبان اسسٹنٹ رجسٹرار دائم اقبال تھے۔