صدر مملکت کو تاحیات گرفتاری سے استثیٰ دینے کی شق کثرت رائے سے منظور

اسلام آباد (صدائے سچ نیوز) سینیٹ میں 27ویں آئینی ترمیم کے ذریعے صدر مملکت کو تاحیات گرفتاری سے استثیٰ دینے کی شق کثرت رائے سے منظور کر لی گئی۔

سینیٹ کا اجلاس چیئرمین یوسف رضا گیلانی کی زیرصدارت ہوا۔ جس میں 27ویں آئینی ترمیم کی شقیں مرحلہ وار پیش کر کے اکثریتی ووٹ سے منظور کی گئیں۔

وزیر قانون اعظم نذیر تارڑ نے آرٹیکل 248 میں وہ ترمیم پیش کی جس کے تحت صدر مملکت کو تاحیات استثنیٰ حاصل ہو گا۔ ترمیم منظور ہونے کے بعد صدر کے عہدے سے سبکدوش ہونے کے بعد بھی ان کے خلاف کسی بھی مقدمے میں کوئی قانونی کارروائی نہیں کی جاسکے گی۔

ترمیم میں یہ شرط بھی شامل کی گئی کہ اگر سبکدوش صدر بعد میں کوئی عوامی عہدہ سنبھالتے ہیں تو یہ استثنیٰ ختم ہوجائے گا۔

یہ بھی پڑھیں: حکومت کو ترمیم منظور کرانے میں تحریک انصاف نے مدد کی، سینیٹر فیصل واوڈا

واضح رہے کہ مذکورہ شق پاکستان پیپلز پارٹی کے مطالبے پر 27ویں آئینی ترمیم کے مسودے میں شامل کی گئی تھی۔