پاکستان کی دفاعی و سفارتی کامیابی، مودی کی بے بسی واضح، وزیراعظم

اسلام آباد (صدائے سچ نیوز) وزیراعظم شہباز شریف نے 27ویں آئینی ترمیم کی کامیابی پر ایوان کو مبارکباد دی اور کہا کہ آج ایوان نے یکجہتی اور اتحاد کی ایک شاندار مثال قائم کی۔

قومی اسمبلی میں خطاب کرتے ہوئے وزیراعظم نے مرحوم محسن دوست عرفان صدیقی کو خراج عقیدت پیش کرتے ہوئے کہا کہ وہ ایک بہترین سیاستدان اوراستاد تھے جنہوں نے اپنی زندگی علم اورعوام کی خدمت میں گزاری۔

وزیراعظم نے وانا میں حالیہ دہشتگردانہ حملے کی شدید مذمت کی اور کہا کہ یہ کوشش سانحہ اے پی ایس جیسی افسوسناک یادیں تازہ کرنے کی تھی۔

انہوں نے بتایا کہ وانا کیڈٹ کالج پر حملہ کرنے والے تمام دہشتگرد مارے جاچکے ہیں اور طلبہ کو باحفاظت ریسکیو کرنے پر پاک فوج کا شکریہ ادا کیا۔

اسلام آباد میں بھی گزشتہ روز ہونے والے دہشتگردانہ واقعے کا حوالہ دیتے ہوئے وزیراعظم نے کہا کہ حملہ آوروں میں افغان شہری بھی شامل تھے اور بھارت دہشتگردوں کی سرپرستی کر رہا ہے۔

یہ بھی پڑھیں: قومی اسمبلی سے 27 ویں آئینی ترمیم دوتہائی اکثریت سے منظور

وزیراعظم نے افغان سرزمین کے پاکستان مخالف استعمال پر سخت تنقید کی اور کہا کہ افغان وزیر خارجہ حملے کے وقت بھارت میں موجود تھے۔

انہوں نے کہا کہ پاکستان نے بھارت کومختلف محاذوں پر شکست دے کر مودی حکومت کو بے بس کردیا اور اس فتح نے پاکستان اور افواج کا نام دنیا بھرمیں روشن کیا، پاکستان کو گزشتہ دہائیوں میں جوعزت ملی ہے، وہ قابل فخر ہے۔