صدرِ مملکت کا کوہاٹ میں دہشت گرد حملے کے دوران پولیس اہلکاروں کی شہادت پر اظہارِ افسوس

اسلام آباد (صداۓ سچ نیوز) صدرِ مملکت آصف علی زرداری نے کوہاٹ میں دہشت گردوں کے حملے میں پولیس اہلکاروں کی شہادت پر گہرے دکھ اور افسوس کا اظہار کرتے ہوئے کہا ہے کہ امن و استحکام کے لیے جانوں کا نذرانہ پیش کرنے والے شہداء کی قربانیاں ہمیشہ یاد رکھی جائیں گی۔

ایوانِ صدر کے پریس ونگ سے جاری بیان کے مطابق صدرِ مملکت نے حملے کی شدید مذمت کرتے ہوئے شہید اہلکاروں کو خراجِ عقیدت پیش کیا اور ان کے اہلِ خانہ سے دلی تعزیت اور یکجہتی کا اظہار کیا۔

انہوں نے کہا کہ دہشت گردی کے خلاف جنگ میں خیبر پختونخوا پولیس کی قربانیاں پوری قوم کے لیے باعثِ فخر ہیں اور دہشت گردوں کے حملے ملک کے عزم کو کمزور نہیں کرسکتے۔

صدر آصف علی زرداری نے کہا کہ پولیس اور دیگر قانون نافذ کرنے والے ادارے عوام کے جان و مال کے تحفظ کے لیے قابلِ قدر خدمات انجام دے رہے ہیں۔ انہوں نے زخمی اہلکاروں کی جلد صحت یابی کے لیے بھی نیک تمناؤں کا اظہار کیا۔