زراعت، غذائی تحفظ میں بیلاروس سے تعاون بڑھانا چاہتے ، رانا تنویر

انطالیہ (صداے سچ نیوز) وفاقی وزیر برائے قومی غذائی تحفظ و تحقیق رانا تنویر حسین نے ازبکستان کے نائب وزیر زراعت علی شیر شکوروف سے ملاقات کی، جس میں زرعی شعبے میں دوطرفہ تعاون کو وسعت دینے اور جدید ٹیکنالوجی کے فروغ کے امکانات پر گفتگو ہوئی۔

وزارت قومی غذائی تحفظ و تحقیق کے مطابق یہ ملاقات ترکیہ میں 31ویں عالمی ماحولیاتی کانفرنس (کوپ 31) کے موقع پر ہوئی۔ اس دوران زرعی تحقیق، بیجوں کی تیاری، باغبانی اور لائیوسٹاک کے شعبوں میں تعاون بڑھانے پر تبادلہ خیال کیا گیا۔

ملاقات میں کپاس اور باغبانی کی فصلوں کے لیے ہائبرڈ اور جینیاتی طور پر تبدیل شدہ (جی ایم او) بیجوں کی تیاری کے سلسلے میں مشترکہ تحقیق کے امکانات کا جائزہ لیا گیا۔ دونوں جانب سے لائیوسٹاک میں تکنیکی تعاون، سائنسی مہارتوں کے تبادلے، تحقیقی تجربات سے استفادے اور جدید زرعی مشینری کے ذریعے پیداوار بڑھانے پر بھی بات چیت ہوئی۔

وفاقی وزیر نے پاکستان میں ازبکستان کے تکنیکی ماہرین پر مشتمل وفد کے مجوزہ دورے کا خیرمقدم کیا اور دونوں ممالک کے زرعی ماہرین اور تحقیقی اداروں کے درمیان براہ راست روابط بڑھانے میں دلچسپی ظاہر کی۔ مجوزہ دورے سے مشترکہ تحقیق، ٹیکنالوجی کی منتقلی اور ادارہ جاتی تعاون کے امکانات کا جائزہ لیا جا سکے گا۔

ملاقات میں ازبکستان کے اینورا (ANORA) پلیٹ فارم کا بھی ذکر کیا گیا، جس کا مقصد سرمایہ کاری کے فروغ، قابل عمل زرعی منصوبوں کی تیاری، پانی کے مؤثر استعمال اور جدید زرعی ٹیکنالوجی کے ذریعے پائیدار اور موسمیاتی تبدیلیوں سے مطابقت رکھنے والے زرعی نظام کو فروغ دینا ہے۔

دونوں ممالک کے درمیان تعاون کے ان امکانات سے زرعی پیداوار بڑھانے، تحقیق کو فروغ دینے اور غذائی تحفظ کو مزید مستحکم بنانے میں مدد مل سکتی ہے۔