سعودی عرب نے حج و عمرہ زائرین کی سہولت کیلئے گائیڈ جاری کر دی

ریاض (صداۓ سچ نیوز) سعودی وزارتِ حج و عمرہ نے زائرین کی رہنمائی اور سہولت کے لیے اردو سمیت 16 مختلف زبانوں میں ”عمرہ وزیارات گائیڈ“ متعارف کرا دی ہے۔

اس اقدام کا مقصد دنیا بھر سے آنے والے عازمین کو ان کی اپنی زبان میں جامع اور مستند معلومات فراہم کرنا ہے، سعودی خبررساں ادارے کے مطابق اس رہنما کتاب میں عمرہ کے مختلف مراحل کی تفصیل بیان کی گئی ہے۔

گائیڈ میں سفر کی تیاری، ویزا اور نسک پلیٹ فارم کے ذریعے عمرہ پرمٹ کے حصول، حرمین شریفین میں آمد و رفت کے انتظامات اور واپسی کے طریقہ کار تک تمام امور کو سادہ اور قابلِ فہم انداز میں پیش کیا گیا ہے۔

زائرین کی آسانی کے لیے گائیڈ میں تصویری وضاحت، مختلف مقامات کے نقشے اور معلوماتی ویڈیوز بھی شامل کی گئی ہیں تاکہ انہیں دورانِ قیام کسی قسم کی دشواری پیش نہ آئے، ڈیجیٹل گائیڈ میں احرام باندھنے کے طریقے، طواف اور سعی کی ادائیگی، حرمین شریفین کے آداب اور وہاں دستیاب بنیادی سہولیات سے متعلق مکمل رہنمائی فراہم کی گئی ہے۔

وزارت کا کہنا ہے کہ اس گائیڈ کا اجرا عمرہ زائرین کو معیاری خدمات کی فراہمی یقینی بنانے کی کوششوں کا حصہ ہے تاکہ وہ اپنے روحانی سفر کے دوران فراہم کردہ سہولیات سے بھرپور فائدہ اٹھا سکیں۔