حملے میں امریکا کا کوئی ہاتھ نہیں، یہ اسرائیل کا انفرادی اقدام ہے، ڈونلڈ ٹرمپ

واشنگٹن (صداۓ سچ نیوز) امریکی صدر ڈونلڈ ٹرمپ نے کہا ہے کہ حملے میں امریکا کا کوئی ہاتھ نہیں، یہ اسرائیل کا انفرادی اقدام ہے۔

ڈونلڈ ٹرمپ نے کہا ہے کہ امریکا کو ایران کی تنصیبات پر اسرائیلی حملے کے بارے میں کوئی پیشگی علم نہیں تھا اور اس کارروائی میں امریکا کا کوئی کردار نہیں، ان کے مطابق اسرائیل نے غصے میں ایران کی پارس گیس فیلڈ کو نشانہ بنایا جو اس کا انفرادی اقدام تھا۔

امریکی صدر نے ایران کی جانب سے قطر کی گیس تنصیبات پر حملے کو انتہائی افسوسناک قرار دیتے ہوئے کہا کہ قطر کا اسرائیلی حملے سے کوئی تعلق نہیں تھا اور ایران نے ایک بے گناہ ملک کو نشانہ بنایا۔

ڈونلڈ ٹرمپ نے ایران کو سخت وارننگ دیتے ہوئے کہا کہ اگر قطر پر دوبارہ حملہ کیا گیا تو امریکا ایران کی گیس فیلڈ پر تباہ کن حملہ کرے گا۔ انہوں نے مزید کہا کہ ایسی صورت میں ایران کو ایسی طاقت کا سامنا کرنا پڑے گا جو اس نے پہلے کبھی نہیں دیکھی ہوگی۔

امریکی صدر کا یہ بھی کہنا تھا کہ اسرائیل اب پارس گیس فیلڈ پر مزید حملے نہیں کرے گا، جبکہ خطے میں بڑھتی کشیدگی کے باعث عالمی سطح پر تشویش میں اضافہ ہو گیا ہے۔