اسرائیلی صنعتی علاقے میں ایرانی حملے کے بعد خطرناک مواد کے اخراج کا خدشہ، رہائشیوں کو گھروں میں رہنے کی ہدایت

بئر السبع (صداۓ سچ نیوز) جنوبی اسرائیل میں بئر السبع کے صنعتی زون پر ایرانی حملے کے بعد خطرناک کیمیائی مواد کے اخراج کا خدشہ ظاہر کیا گیا ہے جس کے باعث صنعتی زون کے اطراف کے رہائشیوں کو گھروں میں رہنے، کھڑکیاں بند رکھنے اور حکام کی ہدایات پر عمل کرنے کی ہدایت دی گئی ہے۔

حکام کے مطابق وسطی اسرائیل کے  بئرالسبع سے ملانے والی مرکزی شاہراہ بند کر دی گئی ہے تاکہ ممکنہ آلودگی کو قابو میں لانے اور کسی ممکنہ کیمیائی اخراج کو روکنے کے ساتھ ساتھ آگ بجھانے کے اقدامات جاری رکھے جا سکیں۔

عرب میڈیا کے مطابق متاثرہ صنعتی زون میں تقریباً 19 مختلف فیکٹریاں موجود ہیں، جن میں برومائیڈ بنانے والی فیکٹری اور دوا ساز ادارے شامل ہیں جبکہ یہاں خطرناک فضلہ ٹھکانے لگانے کے بڑے مراکز بھی واقع ہیں جس کے باعث صورتحال انتہائی حساس قرار دی جا رہی ہے۔

ابھی تک اس بات کی تفصیلات سامنے نہیں آئی ہیں کہ کون سا مخصوص پلانٹ نشانہ بنا اور وہاں کیا تیار کیا جاتا ہے کیونکہ یہ معلومات تاحال فوجی سنسر شپ کے تحت جاری نہیں کی گئیں۔