اہل افراد کو ابتدائی طور پر ایک سال کیلئے ریذیڈنٹ کارڈ جاری کیا جائے گا، پاکستانی سفیر

اسلام آباد (صداۓ سچ نیوز) اسپین میں پاکستا ن کے سفیر ڈاکٹر ظہور احمد نے کہا ہے کہ اہل افراد کو ابتدائی طور پر ایک سال کیلئے ریذیڈنٹ کارڈ جاری کیا جائے گا۔

وزیر داخلہ محسن نقوی اور چودھری سالک حسین کی زیر صدارت ا سپینش ریذیڈنٹ کارڈ سے متعلق اجلاس منعقد ہوا، اجلاس میں بیرون ملک مقیم پاکستانیوں کو قانونی تحفظ اور سہولتوں کی فراہمی کے عزم کا اعادہ کیا گیا۔

اجلاس میں وزارت خارجہ پاکستان کی جانب سے اسپینش ریذیڈنٹ کارڈ کے عمل کو مکمل سپورٹ فراہم کرنے کی یقین دہانی کرائی گئی۔ اس موقع پر اسپین میں پاکستان کے سفیر ڈاکٹر ظہور احمد نے شرکاء کو ریذیڈنٹ کارڈ کے اجرا کے طریقہ کار اور شرائط سے متعلق تفصیلی بریفنگ دی۔

بریفنگ میں واضح کیا گیا کہ یہ پالیسی سیاسی پناہ حاصل کرنے والوں کے لیے نہیں ہے، درخواست گزاروں کے لیے کریکٹر سرٹیفکیٹ اور دیگر مطلوبہ دستاویزات کی فراہمی لازمی قرار دی گئی ہے۔

انہوں نے کہا کہ اہل افراد کو ابتدائی طور پر ایک سال کے لیے ریذیڈنٹ کارڈ جاری کیا جائے گا جبکہ 7 سے 8 سال مکمل کرنے پر مستقل رہائش اور شہریت کے حصول کی راہ ہموار ہو سکے گی۔

اجلاس میں نیشنل پولیس بیورو نے مختلف کریکٹر سرٹیفکیٹس کے بجائے ایک ہی جامع کریکٹر سرٹیفکیٹ جاری کرنے کا فیصلہ کیا تاکہ درخواست گزاروں کو آسانی ہو۔

وزیر داخلہ محسن نقوی نے ہدایت کی کہ درخواست گزاروں کی سہولت کے لیے تصدیق کے عمل کو مزید آسان اور برق رفتار بنایا جائے اور ہر سطح پر مکمل سہولت فراہم کی جائے تاکہ بیرون ملک مقیم پاکستانی اس پالیسی سے بھرپور استفادہ کر سکیں۔