راولپنڈی: سرکاری کارروائی کے دوران ٹی ایم اے ٹیم پر مبینہ فائرنگ و تشدد، مقدمہ درج، ملازمین کا فوری کارروائی کا مطالبہ

راولپنڈی (صدائے سچ نیوز) نواز شریف پارک اور نو تعمیر شدہ یورولوجی اسپتال (کڈنی سینٹر) کے قریب مری روڈ پر تجاوزات کے خلاف کارروائی کے دوران ٹی ایم اے (میونسپل انتظامیہ) کے ملازمین پر ہوائی فائرنگ اور تشدد کا نشانہ بنایاگیا۔

ایف آئی آر کے مطابق ٹی ایم اے کی ٹیم سرکاری جگہ واگزار کرانے اور تجاوزات کے خلاف آپریشن کے لیے موقع پر پہنچی تھی۔ اسی دوران مبینہ طور پر مقامی شوروم سے تعلق رکھنے والے افراد نے مزاحمت کی اور صورتحال کشیدہ ہو گئی۔

تفصیلات کے مطابق قیصر شاہ مسلح کلاشنکوف اور ملک نومی مسلح پسٹل نے اپنے ساتھیوں کے ساتھ مل کر ٹی ایم اے اہلکاروں کے ساتھ تلخ کلامی کے بعد مبینہ طور پر ہوائی فائرنگ کی، سرکاری عملے پر حملہ کیا اور تشدد کیا۔درج رپورٹ کے مطابق ملزمان نے انسپکٹر راجہ تنویر کو پسٹل کے بٹ مارے اور تشدد کا نشانہ بھی بنایا۔ واقعے کے بعد متاثرہ اہلکاروں نے متعلقہ تھانے میں درخواست جمع کرا دی اور ملزمان کے خلاف مقدمہ درج کرکے فوری گرفتاری کا مطالبہ کیا ہے۔

ذرائع کے مطابق پولیس نے موقع پر پہنچ کر جائے وقوعہ کا جائزہ لیا اور مبینہ ہوائی فائرنگ کے شواہد کے طور پر خول بھی تحویل میں لے لیے۔ واقعے کے بعد علاقے کے دکانداروں اور شہریوں میں خوف و ہراس پایا گیا۔

ٹی ایم اے ملازمین نے مؤقف اختیار کیا ہے کہ اگر ذمہ دار افراد کے خلاف فوری قانونی کارروائی نہ کی گئی تو وہ احتجاج کا حق محفوظ رکھتے ہیں اور مری روڈ پر احتجاج بھی کیا جا سکتا ہے۔ انہوں نے اعلیٰ حکام سے مطالبہ کیا ہے کہ سرکاری ٹیم پر حملے کے واقعے کا نوٹس لے کر قانون کے مطابق کارروائی کی جائے۔

علاقہ مکینوں اور دکانداروں نے بھی انتظامیہ سے مطالبہ کیا ہے کہ تجاوزات اور غیر منظور شدہ تعمیرات کے خلاف بلاامتیاز کارروائی کی جائے۔ ان کا کہنا ہے کہ علاقے میں بعض تعمیرات قواعد و ضوابط کے مطابق نہیں اور انتظامیہ کو دیگر شہروں کی طرز پر مؤثر آپریشن کرنا چاہیے۔