اختر عباس، الوداع یارِ من !

تحریر: ڈاکٹر حسنین سید

وہ اسلام آباد میں میرا پہلا دوست تھا، روہی ٹی وی کا پہلا تعلق
میں اُسے بلوچ اور وہ مجھے مُرشد کہا کرتا تھا۔۔۔

یہ تب کی بات ہے جب ہم پیسے بچانے کیلئے پیدل چلا کرتے تھے، چائنہ چوک سے گزرتے ہوئے مجھےاُس نے کہا۔۔۔ مرشد میں نے شہید ملت سیکریٹریٹ کے ساتھ بننے والی عمارتوں میں دیہاڑی پر مزدوری بھی کی ہے
میں بولا
یار بلوچ وہ زمانے گزر گئے اب ہم ٹی وی جرنلسٹ ہیں جلد یا بادیر یہ شہر ہمیں قبول کرلےگا، تم دیکھ لینا۔۔۔

میں نے آج گوگل سے پوچھا ہماری یاری کوکتنا وقت گزرا، جواب آیا 19 برس 6 مہینے اور 19 دن۔
ان برسوں میں کتنے ہی زمانے گزرے مجھے نہیں معلوم۔۔۔ دو دہائیوں پر پھیلی اس دوستی میں ہم بیسیوں بار کِھل کِھلا کرہنسے بھی اور برستی آنکھوں سے روئے بھی۔۔

اُس کی ایک خوبی مجھے بہت پسند تھی، اُس نے میرے سارے دوستوں اور رشتہ داروں کو اپنا دوست بنا لیا تھا۔ وسیم ملک، اعتزاز نقی، خالد چوہدری، تحسین شاہ، نیاز شاہ، مدثر زیدی، جواد بھائی، جنید شاہ، عامر بخاری، رمیض حسن، اعتزاز حسن، طفیل انجم، لا لہ غیاث، فیصل شاہ، صفدر بلوچ،اور نادر بلوچ۔۔۔

کیا چھوٹا کیا بڑا سبھی اس کے دوست تھے، میں گاوں جاتا تو واپسی پر تین بندوں کے بارے میں اکثر پوچھتا، ایک نیاز شاہ، دوسرا صفدر بلوچ اور تیسرا میرے بابا (وہ اُن کو بڑے مرشد کہا کرتا تھا)

روہی کے زمانے میں عمران پرواز، میں اور بلوچ ایک ہی شفٹ میں ہوا کرتے تھے، پرواز یاد ہے نا تمھیں سب کچھ،،، بلوچ کی چھوٹی چھوٹی شرارتیں اور ہمارے بلند آواز قہقے۔۔۔

بلوچ ! یار ہم جب تک زندہ ہیں نا،،، سب کے سب تمھاری محبتوں کے مقروض رہیں گے،
ریاض کھوسہ کے بارے میں بلوچ کہتا تھا وہ تو سردار ہے، ابھی ایک جگہ میں نے ریاض کھوسہ کا جملہ پڑھا، لکھا تھا اختر بلوچ اِس معاشرے میں اَن فٹ تھا،شاید وہ درست کہہ رہے ہیں،

دو ہفتے پہلے جب اُس کے پمز میں زیر علاج ہونے کی خبر میرے گھر تک پہنچی تو میری اماں نے حکم دیا "جب تم بیمار ہوئے تھے وہ تمھارے لئے آیا تھا، اب تم بھی اسکا خیال کرنا،،،

میں نے کوشش کی مگر میں شرمندہ ہوں کہ دوستی کا حق ادا نہیں کرسکا
چارنومبر 2006 کواُس نے میری طرف دوستی کا جو ہاتھ بڑھایا آج 22 اپریل 2026 کو میں نے اُنہی ہاتھوں سے اُسے پوسٹمارٹم کی میزسے ایمبولینس میں منتقل کیا

بلوچ تم نے مجھے اسلام آباد میں خوش آمدید کہا تھا اور میں نے اسلام آباد سے تم کو الوداع کہا،
مگرراضی رہنا میری اوقات بس اتنی ہی تھی،،،،

بلوچ آج تم دنیا کی ساری تکلیفوں کو پیچھے چھوڑ کراپنے سفر آخرت پر روانہ ہو رہے ہو، تم جانتے ہو ناں کہ آج کون کون تمھارے پاس آ رہا ہے۔۔۔ مطمئن رہنا کہ یوسفِ زہرا تمھارا وارث ہے

افتخارعارف نے کہا تھا ۔۔۔۔ !
"کبھی سلمان آتے ہیں
کبھی بوذر، کبھی میثمم، کبھی قنبرمیری ڈھارس بندھاتے ہیں
کمیل آتے ہیں، کہتے ہیں
پکاروافتخارعارف پکارو
اپنے مولا کو پکارو، اپنے مولا کے وسیلے سے پکارو
اُجیب دعوت الداع کا دعوی کرنے والے کو پکارو

یہ مشکل بھی کوئی مشکل ہے دل چھوٹا نہیں کرتے
کریم اپنے غلاموں کو کبھی تنہا نہیں کرتے کبھی رسوا نہیں کرتے”
وہ حُسین کا چاہنے والا تھا
مالک وہ تیرے حُسین کا چاہنے والا تھا

مالک تیرا وعدہ ہے نا
"وَاصْبِرْ فَإِنَّ اللَّهَ لَا يُضِيعُ أَجْرَ الْمُحْسِنِينَ”
مالک تو اپنا وعدہ پورا کر،کہ تو اپنے وعدوں کے خلاف نہیں کرتا

پروردگاروہ آج رات تیرا مہمان،
کہ تو سب سے اچھا مہمان نواز ہے
مالک ہم اُسے تیرے سپرد کرتے ہیں، کہ تو ربِ کریم ہے
دیکھو یار، حوصلہ مت ھارنا کہ میں نے تم کو ہمیشہ خدائے بزرگ و برتر پرتوکل کرنے والا پایا،

بلوچ ! میرے پاس دعا اور لفظوں کے علاوہ کچھ نہیں
دعا گو ہوں کہ مولا رسول خدا اور مولا امیر المومنین کے وسیلے سے کریم اللہ تم کو آسانیاں عطا فرمائے، ہم دعاوں کی شکل میں تم کو چھوٹے چھوٹے تحفے بھیجتے رہیں گے،

مونجھا نہ تھیویں
یار اگر موقع ملے تو ایک دفعہ مجھے ملنا ضرور،،،
میکوں تانگ رہسی ،،،

I shall be waiting
تمھارا یار
ڈاکٹر حسنین سید