مذاکرات کامیاب، گڈز ٹرانسپورٹرز اتحاد کا ہڑتال مؤخر کرنے کا اعلان

حکومت اور ٹرانسپورٹرز میں مذاکرات کامیاب ہوگئے۔ آل پاکستان گڈز ٹرانسپورٹرز اتحاد نے ہڑتال 40 دن کیلئے موخر کرنے کا اعلان کردیا۔

صدر ٹرانسپورٹرز اتحاد شہزاد اعوان نے وفاقی وزیرعبدالعلیم خان کا شکریہ ادا کیا۔ کہا عبدالعلیم خان نے سب سے پہلے ہمیں سنا۔ تعاون کی یقین دہانی کرائی۔

شہزاد اعوان کا کہنا تھا کہ وفاق اور صوبائی حکومتوں نے تقریباً تمام مطالبات تسلیم کرلیے۔ ود ہولڈنگ ٹیکس میں کمی کے مطالبے پر کمیٹی بنادی گئی ہے۔ حکومت نے پیٹرول اورڈیزل کی قیمتوں میں یومیہ تبدیلی کے فیصلے پر15دن کا وقت مانگا ہے۔

اس موقع پر میڈیا سے گفتگو میں وفاقی وزیر مواصلات عبدالعلیم خان نے کہا کہ ہم سنجیدگی سے بیٹھے اور ٹرانسپورٹ اتحاد نے ہمیں سنا، ٹرانسپورٹرز کے بہت سارے مسائل حل ہوچکے ہیں، جوچیزیں حل ہونے میں وقت لیں گی ان کیلئے کمیٹیاں بنادی گئی ہیں۔

عبدالعلیم خان نے کہا کہ وزیرپیٹرولیم علی پرویزملک اور وزیربحری امورجنیدانوار نے بھرپورساتھ دیا، پاکستان کیلئے ہم اسی جذبے کے تحت چلیں گے، ملک شہزاداوران کی ٹیم کا مشکور ہوں، گورنرسندھ نے سب دوستوں کو اکٹھا کیا۔