وزیراعلیٰ خیبرپختونخوا انتخاب، اسپیکر نے گورنر کو انتخاب کی سمری بھیج دی

پشاور (صدائے سچ نیوز) خیبرپختونخوا اسمبلی کے اسپیکر بابر سلیم سواتی نے وزیراعلیٰ کے انتخاب کی سمری گورنر فیصل کریم کنڈی کو بھیج دی۔

ایک نجی ٹی وی چینل کے مطابق صوبائی اسمبلی کے اسپیکر بابر سلیم سواتی کی جانب سے کہا گیا کہ قواعد و ضوابط کے تحت وزیراعلیٰ کے انتخاب کی تفصیل سے گورنر کو آگاہ کر نا ہوتا ہے۔

سمری میں کہا گیا کہ آج خیبرپختونخوا اسمبلی ہال میں نئے وزیراعلیٰ کے لئے انتخاب ہوا، وزیراعلیٰ کے انتخاب کے لئے 4 امیدوار تھے، جن میں محمد سہیل آفریدی، شاہ جہاں، ارباب زرک اورلطف الرحمٰن خان شامل تھے۔

صوبائی اسمبلی کے اسپیکر نے مزید کہا کہ 3 امیدواروں شاہ جہان، ارباب زرک اور لطف الرحمان نے صفر ووٹ لیے جب کہ محمد سہیل آفریدی نے 145 ٹوٹل میں سے 90 ووٹ حاصل کیے۔

سمری میں مزید کہا گیا کہ آرٹیکل 130(4) کے تحت سہیل آفریدی کو فاتح قرار دیا جاتا ہے، آپ آرٹیکل 130(5) کے تحت نو منتخب وزیراعلیٰ سے حلف لیں تاکہ وہ اپنی زمہ داریاں سنبھالیں۔