پاکستان کی افغانستان میں کارروائیاں، دہشت گردوں کے 7 ٹھکانے ملیا میٹ کر دیے

کابل(صداۓ سچ نیوز) پاکستان نے افغان طالبان کی دہشت گردانہ کارروائیوں کے جواب میں افغانستان میں دہشتگردوں کے سات ٹھکانے ملیامیٹ کر دیے۔

وزارتِ اطلاعات و نشریات نے کہا ہے کہ پاکستان نے انٹیلی جنس بنیادوں پر پاک افغان سرحدی علاقے میں کامیاب کارروائی کرتے ہوئے فتنہ الخوارج سے وابستہ طالبان اور اسلامک اسٹیٹ کے سات دہشت گرد کیمپوں کو نشانہ بنایا۔

وزارت اطلاعات کے جاری کردہ بیان کے مطابق حالیہ حملوں، بالخصوص بنوں واقعے کی منصوبہ بندی افغانستان میں موجود خوارج قیادت کی ہدایت پر کی گئی۔ بیان میں کہا گیا کہ ان حملوں کی ذمہ داری افغانستان میں موجود پاکستانی طالبان، فتنہ الخوارج نے قبول کی ہے۔

پاکستان نے دہشت گرد کیمپوں اور ٹھکانوں کو نہایت درستگی کے ساتھ نشانہ بنایا اور اس کارروائی کا مقصد غیر ملکی پراکسیز کو دہشت گرد سرگرمیوں کے لیے افغان سرزمین استعمال کرنے سے روکنا ہے۔

بیان میں افغان عبوری حکومت پر زور دیا گیا کہ وہ خوارج اور دیگر دہشت گرد عناصر کو اپنی سرزمین پاکستان یا کسی اور ملک کے خلاف استعمال ہونے سے روکے۔

وزارت اطلاعات نے کہا کہ پاکستان خطے میں امن و استحکام کے لیے مسلسل کوشاں رہا ہے تاہم اپنے شہریوں کا تحفظ اولین ترجیح ہے۔

مزید کہا گیا کہ عالمی برادری طالبان پر دوحا معاہدہ کے تحت کیے گئے وعدوں کی پاسداری کے لیے زور دے، بیان میں کہا گیا کہ افغان سرزمین کو دیگر ممالک کے خلاف استعمال سے روکنا علاقائی اور عالمی سلامتی کے لیے ناگزیر ہے۔