گوجر خان: پنجاب حکومت کی گرین الیکٹرک بس سروس کا آغاز

گوجر خان (افراز راجہ سے) گوجر خان میں پنجاب حکومت نے ماحول دوست اور جدید سفری سہولیات کی فراہمی کے لیے گرین الیکٹرک بس سروس باقاعدہ طور پر شروع کر دی ہے۔ اس سروس کے تحت ابتدائی مرحلے میں 14 سے 15 جدید الیکٹرک بسیں سڑکوں پر اتاری گئی ہیں۔

یہ بسیں گوجر خان ٹرمینل، سوہاوا اور پولیس کمپلیکس کے درمیان چل رہی ہیں، جس سے روزانہ سفر کرنے والے شہریوں کو آرام دہ، محفوظ اور معیاری سفری سہولت میسر آ رہی ہے۔

حکومتی اعلان کے مطابق خواتین، طلبہ اور 60 سال سے زائد عمر کے بزرگ شہریوں کے لیے اس بس سروس میں سفر مکمل طور پر مفت ہے، جبکہ دیگر مسافروں کے لیے کرایہ صرف 20 روپے مقرر کیا گیا ہے، جو عوام کے لیے ایک بڑی سہولت قرار دی جا رہی ہے۔

حکام کا کہنا ہے کہ یہ منصوبہ پنجاب حکومت کے سبز اور پائیدار پبلک ٹرانسپورٹ کے وژن کا حصہ ہے، جس کا مقصد ماحولیاتی آلودگی میں کمی لانا، ایندھن کے اخراجات کم کرنا اور شہریوں کو سستی اور جدید سفری سہولیات فراہم کرنا ہے۔

عوامی حلقوں نے اس اقدام کو خوش آئند قرار دیتے ہوئے توقع ظاہر کی ہے کہ مستقبل میں اس سروس کا دائرہ کار مزید علاقوں تک بڑھایا جائے گا۔