عمران خان کیخلاف وزیراعظم کی ہرجانے کی درخواست پر ٹرائل کورٹ کو کارروائی سے روک دیا گیا

اسلام آباد (صداۓ سچ نیوز) سپریم کورٹ آف پاکستان نے بانی پی ٹی آئی عمران خان کیخلاف وزیراعظم کی ہرجانے کی درخواست پر ٹرائل کورٹ کو کارروائی سے روک دیا۔

تفصیلات کے مطابق وزیراعظم شہباز شریف کی جانب سے بانی پی ٹی آئی عمران خان کے خلاف دائر ہرجانہ کیس میں اہم پیش رفت سامنے آئی ہے۔

جسٹس عائشہ ملک کی سربراہی میں 3 رکنی بینچ نے کیس کی سماعت کی، عدالت نے عمران خان کی درخواست پر ٹرائل کورٹ کو مزید کارروائی سے روک دیا۔

بینچ نے شہباز شریف کو نوٹس جاری کرتے ہوئے جواب طلب کر لیا اور قرار دیا کہ کیس کو جلد سماعت کے لیے مقرر کیا جائے گا۔

سماعت کے دوران جسٹس عائشہ ملک نے ریمارکس دیے کہ دوسری جانب سے آج کوئی پیش نہیں ہوا۔مقدمے میں میرا اختلافی نوٹ ہے،دو ججز نے حق دفاع ختم کرنے کے فیصلے کو درست قرار دیا تھا۔

وکیل علی ظفر نے عدالت میں مؤقف اختیار کیا کہ بانی پی ٹی آئی کی ٹانگ میں گولی لگی تھی،بانی پی ٹی آئی زخمی ہونے کے باعث کیس میں پیش نہ ہوسکے،ٹرائل کورٹ نے بانی پی ٹی آئی کی عدم پیروی پر حق دفاع کردیا۔

جسٹس عائشہ ملک نے وکیل سے سوال کیا کہ کتنے ارب ہرجانے کا دعویٰ ہے ؟وکیل علی ظفر نے عدالت کوجواب دیا کہ 10ارب روپے کا دعویٰ کیا گیا۔

عدالت نے کہا کہ ٹرائل کورٹ نے حق دفاع ختم کرنے سے پہلے دو تاریخوں پر بانی کا زخمی ہونا تسلیم کیا ، جسٹس عائشہ ملک نے کہا کہ زخمی ہونا تسلیم کرنے کے بعد حق دفاع کیسے ختم کیا جا سکتا ہے ؟ہم مقدمہ میں دوسرے فریق کو نوٹسز کررہے ہیں۔