اقوام متحدہ کے سیکریٹری جنرل 3 روزہ دورہ پاکستان مکمل کرکے واپس روانہ

اسلام آباد (صداۓ سچ نیوز) اقوام متحدہ کے سیکریٹری جنرل انتونیو گوتریس تین روزہ دورہ پاکستان مکمل کرکے اسلام آباد سے واپس روانہ ہوگئے،دورے میں اقوام متحدہ کے منشور، کثیرالجہتی نظام اور عالمی امن کے لیے پاکستان کے عزم کا اعادہ کیا گیا۔

انتونیو گوتریس کے دورہ پاکستان میں صدر مملکت،نائب وزیراعظم اسحاق ڈار اور وفاقی وزیر داخلہ محسن نقوی سمیت اعلیٰ حکام سے ملاقاتیں ہوئیں،صدر مملکت سے ملاقات میں انتونیو گوتریس کو عالمی امن کے لیے خدمات کے اعتراف میں نشان امتیاز عطا کیا گیا۔

نائب وزیراعظم اسحاق ڈار سےملاقات میں کشمیر، فلسطین، افغانستان، انسداد دہشت گردی، علاقائی و عالمی امن اور موسمیاتی تبدیلی سمیت اہم امور پر تبادلہ خیال ہوا۔

محسن نقوی سے ملاقات میں عالمی و علاقائی صورتحال اور اقوام متحدہ کے امن مشنز کے امور زیر بحث آئے،وزیرداخلہ نے بتایا کہ پاکستان نے امن مشنز میں ایک سو اکیاسی جانوں کا نذرانہ پیش کیا ہے۔ انتونیو گوتریس نے امن مشنز میں پاکستان کے نمایاں کردار کو سراہا۔

ترجمان دفتر خارجہ کے مطابق دورہ اقوام متحدہ کے منشور سے پاکستان کے غیر متزلزل عزم اور انتونیو گوتریس کی قیادت و عالمی امن کے لیے خدمات کے اعتراف کا مظہر ہے۔