وائٹ ہاؤس میں شہد کی مکھیوں کا حملہ؟ میلانیا کے نئے بی ہائیو منصوبے کے بعد ہلچل مچ گئی

واشنگٹن (صداۓ سچ نیوز) امریکا کے صدارتی محل وائٹ ہاؤس میں اُس وقت غیر متوقع صورتحال پیدا ہوگئی جب ہزاروں شہد کی مکھیوں نے نارتھ لان پر اچانک ہجوم کی شکل اختیار کرلی۔

غیر ملکی میڈیا رپورٹس کے مطابق وائٹ ہاؤس کے پریس ایریا کے قریب فضا میں سیاہ نقطے نمودار ہوئے، جو بعد میں شہد کی مکھیوں کا بڑا جھنڈ ثابت ہوئے، تقریباً 20 منٹ بعد یہ مکھیاں نارتھ لان میں موجود ایک درخت پر چھتے کی شکل میں جمع ہوگئیں۔

رپورٹس کے مطابق حال ہی میں خاتونِ اول میلانیا ٹرمپ نے وائٹ ہاؤس کے احاطے میں 2 نئی مکھیوں کی کالونیاں شامل کرنے کا اعلان کیا تھا، جبکہ ساؤتھ لان میں وائٹ ہاؤس کی طرز پر تیار کیا گیا ایک نیا نمائشی چھتہ بھی نصب کیا گیا۔

دلچسپ بات یہ ہے کہ یہ واقعہ ایسے وقت میں پیش آیا جب برطانیہ کے بادشاہ کنگ چارلس سوم اور ملکہ کیمیلا نے حالیہ دورۂ امریکا کے دوران اس نئے بی ہائیو کا دورہ کیا تھا، شاہی جوڑا شہد کی مکھیوں کی افزائش اور ماحول دوست سرگرمیوں کا حامی سمجھا جاتا ہے۔

واقعے کے بعد سوشل میڈیا پر دلچسپ تبصروں کی بھرمار ہوگئی۔ 

ایک صارف نے لکھا کہ شہد کی مکھیاں بھی اب وائٹ ہاؤس سے تنگ آگئی ہیں، ایک اور صارف نے مزاحیہ انداز میں کہا یہ حملہ نہیں تھا، مکھیاں صرف یہ پوچھنے آئی تھیں کہ انسان 40 گھنٹے کام کرکے بھی شہد کیوں نہیں خرید سکتے۔

 ایک صارف نے دعویٰ کیا کہ یہ عام مکھیاں نہیں بلکہ نینو ڈرونز ہوسکتے ہیں، جو نگرانی سمیت مختلف مقاصد کے لیے استعمال کیے جاتے ہیں۔