زمین کا تحفظ مشترکہ عالمی چیلنج ،اس سے نمٹنے کے لیے اجتماعی شعور اور مربوط حکمتِ عملی ضروری ہے،سید یوسف رضا گیلانی

اسلام آباد (صداۓ سچ نیوز) چیئرمین سینیٹ سید یوسف رضا گیلانی نے کہا ہے کہ زمین کا تحفظ عصرِ حاضر کا ایک اہم اور مشترکہ عالمی چیلنج بن چکا ہے جس سے مؤثر طور پر نمٹنے کے لیے اجتماعی شعور، مربوط حکمتِ عملی اور عملی اقدامات ناگزیر ہیں۔سینیٹ سیکرٹریٹ کے مطابق ان خیالات کا اظہار انہوں نے’’ عالمی یوم ارض ‘‘ کے موقع پر اپنے پیغام میں کیا۔

انہوں نے کہا کہ رواں سال کا موضوع ’’ ہماری طاقت،ہمارا سیارہ ‘‘ اس حقیقت کی عکاسی کرتا ہے کہ کرۂ ارض کی بقا اور سلامتی کا دارومدار انسانیت کی مشترکہ کاوشوں پر ہے۔

سید یوسف رضا گیلانی نے کہا کہ زمین کا تحفظ عصرِ حاضر کا اہم اور مشترکہ عالمی چیلنج بن چکا ہے جس سے مؤثر طور پر نمٹنے کے لیے اجتماعی شعور اور مربوط حکمتِ عملی کی ضرورت ہے۔

چیئرمین سینیٹ نے کہا کہ موسمیاتی تبدیلی کے اثرات دنیا بھر کی طرح پاکستان میں بھی تیزی سے شدت اختیار کر رہے ہیں، بڑھتا ہوا درجہ حرارت، پانی کی قلت، فضائی آلودگی اور جنگلات میں کمی جیسے عوامل نہ صرف ماحول بلکہ آنے والی نسلوں کے محفوظ مستقبل کے لیے بھی سنگین خطرہ بن چکے ہیں۔ انہوں نے زور دیا کہ ان چیلنجز سے نمٹنے کے لیے صرف پالیسی سازی کافی نہیں بلکہ انفرادی اور اجتماعی سطح پر طرزِ زندگی میں مثبت تبدیلی ناگزیر ہے۔

سید یوسف رضا گیلانی نے کہا کہ شجرکاری، پانی و توانائی کے دانشمندانہ استعمال، پلاسٹک کے کم سے کم استعمال اور صفائی کے فروغ جیسے اقدامات بظاہر معمولی دکھائی دیتے ہیں مگر مجموعی طور پر یہ ماحولیاتی تحفظ میں نہایت مؤثر کردار ادا کر سکتے ہیں۔ انہوں نے تعلیمی اداروں، سماجی تنظیموں اور بالخصوص نوجوانوں کے کردار کو سراہتے ہوئے کہا کہ ماحولیاتی شعور کی بیداری اور پائیدار طرزِ زندگی کے فروغ میں ان کا کردار کلیدی حیثیت رکھتا ہے۔

چیئرمین سینیٹ نے ایوانِ بالا کے کردار کو اجاگر کرتے ہوئے کہا کہ سینیٹ نے ماحولیاتی تحفظ کے لیے قانون سازی، متعلقہ قائمہ کمیٹیوں کی فعالیت اور پالیسی نگرانی کے ذریعے نمایاں پیش رفت کی ہے۔ انہوں نے کہا کہ ماحولیاتی آلودگی کے خاتمے، قدرتی وسائل کے تحفظ اور پائیدار ترقی کے فروغ کے لیے متعدد اقدامات زیرِ غور ہیں جو ملک کو محفوظ، متوازن اور پائیدار ماحولیاتی نظام کی جانب گامزن کریں گے۔

سید یوسف رضا گیلانی نے کہا کہ پاکستان کا مستقبل صاف، سرسبز اور محفوظ ماحول سے وابستہ ہے، یہ ہم سب کی مشترکہ ذمہ داری ہے کہ ہم اپنی آنے والی نسلوں کے لیے زمین کو بہتر حالت میں چھوڑیں۔

انہوں نے عوام سے اپیل کی کہ یومِ ارض کو محض ایک دن تک محدود نہ رکھا جائے بلکہ اسے مستقل بنیادوں پر ماحول دوست طرزِ زندگی اپنانے کے عزم میں تبدیل کیا جائے۔

چیئرمین سینیٹ سید یوسف رضا گیلانی نے کہا کہ اگر ہم اپنی اجتماعی طاقت کو مثبت اور تعمیری سمت میں بروئے کار لائیں تو پائیدار، محفوظ اور خوشحال مستقبل کا حصول ممکن ہےاور یہی ہماری سیارے کے ساتھ حقیقی وفاداری کا تقاضا ہے۔