عالمی منڈی میں خام تیل کی قیمتوں میں نمایاں کمی، وجوہات کیا ہیں؟

عالمی منڈی میں تیل کی قیمتوں میں پیر کو ایک ڈالر فی بیرل سے زیادہ کمی ریکارڈ کی گئی، جس کی بنیادی وجہ سرمایہ کاروں کی جانب سے منافع کا حصول اور امریکا کی جانب سے ایران پر مزید پابندیوں کے متوقع اعلان سے قبل محتاط رویہ ہے۔

پیر کو برینٹ کروڈ کے فیوچرز کی قیمت 1.22 ڈالر یا 1.29 فیصد کم ہوکر 93.17 ڈالر فی بیرل ہوگئی، جبکہ امریکی ویسٹ ٹیکساس انٹرمیڈیٹ (ڈبلیو ٹی آئی) خام تیل 1.20 ڈالر یا 1.38 فیصد کمی کے بعد 85.86 ڈالر فی بیرل پر آگیا۔

دونوں بینچ مارک گزشتہ ہفتے مسلسل دوسری ہفتہ وار تیزی کے ساتھ بند ہوئے تھے اور ان کی قیمتوں میں 5 فیصد سے زیادہ اضافہ ہوا تھا۔ امریکا اور ایران کے درمیان امن مذاکرات میں تعطل کے باعث آبنائے ہرمز سے تیل کی ترسیل متاثر ہوئی ہے، جہاں عالمی سطح پر استعمال ہونے والی تقریباً 20 فیصد حصے کی تیل سپلائی گزرتی ہے۔

امریکی وزیر خزانہ اسکاٹ بیسنٹ پیر کو 2 بجے پریس کانفرنس کریں گے، جس میں ایران کے خلاف نئی پابندیوں کا اعلان متوقع ہے۔ بیسنٹ پہلے ہی ایران پر تاریخ کی سخت ترین پابندیاں عائد کرنے کی دھمکی دے چکے ہیں۔ صدر ڈونلڈ ٹرمپ نے ایران کے تجارتی شراکت داروں پر بھی پابندیاں عائد کرنے کا عندیہ دیا ہے۔

تجزیہ کاروں کے مطابق یہ واضح نہیں کہ ایران کو معاشی طور پر تنہا کرنے کی امریکی پالیسی کس حد تک مؤثر ثابت ہوگی۔ تاہم، اگر اقدامات کامیاب ہوئے تو ایران کی جانب سے بڑھتے ہوئے تشدد کا خطرہ توانائی کی عالمی منڈیوں کے لیے اہم چیلنج بن سکتا ہے۔