پینٹاگون ایران پر نئے حملوں کے منصوبے تیار کر رہا ہے، میزائل اور ڈرون ذخائر، توانائی تنصیبات کو نشانہ بنایا جائیگا، امریکی اخبار کی رپورٹ

واشنگٹن (صداۓ سچ نیوز) امریکی اخبار نیو یارک ٹائمز کی رپورٹ کے مطابق امریکی عہدیداروں نے بتایا کہ امریکی فوج ایران پر بڑے پیمانے پر حملے دوبارہ شروع کرنے کے منصوبوں پر کام کر رہی ہے۔

رپورٹ کے مطابق ان منصوبوں کے تحت تین روز تک شدید حملے کرنے کے آپشن شامل ہیں، جن میں ایران کے میزائل اور ڈرون ذخائر، توانائی تنصیبات اور پاسدارانِ انقلاب کے کمانڈ مراکز کو نشانہ بنایا جاسکتا ہے۔

نیو یارک ٹائمز کے مطابق گزشتہ ہفتےکیمپ ڈیوڈ میں نائب صدر جے ڈی وینس کی قیادت میں اعلیٰ قومی سلامتی حکام نے ان منصوبوں پر غور کیا۔

واضح رہا امریکی صدر ڈونلڈ ٹرمپ چند ماہ کے دوران ایران اور یمن میں حوثیوں کے خلاف بڑے فوجی آپریشنز کی پانچ تجاویز مسترد کرچکے ہیں۔

گزشتہ روز بھی امریکی صدر مڈٹرم الیکشنز سے پہلے ایران پر نئے حملے کے خدشات کو مسترد کرتے ہوئےکہا تھا کہ دونوں ممالک کے درمیان مثبت بات چیت جاری ہے۔