نیتن یاہو ایران پر دوبارہ حملوں کے خواہاں، ٹرمپ سے روزانہ رابطے کا انکشاف، فنانشل ٹائمز

تل ابیب (صداے سچ نیوز) اسرائیلی وزیراعظم نیتن یاہو ایران کے خلاف دوبارہ فوجی کارروائی شروع کرنے کے خواہاں ہیں اور اس مقصد کے لیے امریکی صدر ڈونلڈ ٹرمپ سے روزانہ ٹیلی فون پر رابطہ کر رہے ہیں۔

برطانوی اخبار فنانشل ٹائمز کی رپورٹ کے مطابق، اس معاملے سے باخبر ذرائع کا کہنا ہے کہ نیتن یاہو کی جانب سے ایران پر دوبارہ حملوں کی کوششوں پر وائٹ ہاؤس کے اندر اور باہر موجود جنگ مخالف حلقوں میں تشویش پائی جاتی ہے۔ یہ حلقے نئی فوجی کارروائی روکنے کے لیے سرگرم ہیں۔

رپورٹ میں بتایا گیا ہے کہ خطے کے متعدد رہنما بھی امریکی صدر ٹرمپ پر زور دے رہے ہیں کہ وہ ایران کے ساتھ کشیدگی میں مزید اضافے سے گریز کریں اور فوجی کارروائی کے بجائے سفارتی مذاکرات کو موقع دیں۔

نیتن یاہو کے مبینہ منصوبے نے عرب اور مسلم ممالک کے رہنماؤں میں بھی تشویش پیدا کر دی ہے، جنہیں خدشہ ہے کہ ایران پر نئے حملے پورے خطے کو ایک وسیع تنازع میں دھکیل سکتے ہیں۔

تاہم اسرائیلی صورتِ حال سے واقف ایک دوسرے ذریعے نے فنانشل ٹائمز کو بتایا کہ نیتن یاہو ایران کے خلاف دوبارہ کارروائی کے خواہاں ضرور ہیں، لیکن فی الحال ٹرمپ کو اس معاملے پر قائل کرنے کے لیے کوئی باضابطہ مہم نہیں چلائی جا رہی۔

دوسری جانب امریکی صدر ڈونلڈ ٹرمپ نے پیر کے روز کہا کہ خلیجی ممالک ایران کے خلاف نئی فوجی کارروائی کے حامی نہیں ہیں۔ قطری وزیراعظم شیخ محمد بن عبدالرحمان آل ثانی سے ملاقات کے بعد ٹروتھ سوشل پر اپنے بیان میں انہوں نے کہا کہ قطر، سعودی عرب، متحدہ عرب امارات، بحرین، کویت اور دیگر ممالک موجودہ صورتِ حال برقرار رکھنے کو ترجیح دیں گے۔

فنانشل ٹائمز کے مطابق، اسرائیل میں گزشتہ ماہ ہونے والے غیر فیصلہ کن انتخابات کے بعد نیتن یاہو نگراں وزیراعظم کے طور پر کام کر رہے ہیں۔ وہ ایران کی حکومت کو اقتدار سے ہٹانے کے لیے امریکا اور اسرائیل کے مشترکہ فضائی حملوں کی دوبارہ حمایت کر رہے ہیں۔

اس کے برعکس صدر ٹرمپ نے ایران کے ساتھ تقریباً نو ماہ سے جاری جنگ ختم کرنے کے لیے مثبت پیش رفت کا عندیہ دیا ہے۔ ان کا کہنا ہے کہ ایران پر امریکا کے نئے حملوں کا امکان اب کافی کم دکھائی دیتا ہے۔

رپورٹ میں بتایا گیا ہے کہ قطری وزیراعظم سے ملاقات میں شریک ایک سفارت کار کے مطابق، دونوں رہنماؤں نے اس بات پر اتفاق کیا کہ ایران کے ساتھ کسی معاہدے تک پہنچنے کے لیے سفارت کاری کو ترجیح دی جانی چاہیے۔

اسی تناظر میں ترکیہ کے صدر رجب طیب اردوان، سعودی ولی عہد محمد بن سلمان، متحدہ عرب امارات کے صدر شیخ محمد بن زاید النہیان اور امیر قطر شیخ تمیم بن حمد آل ثانی نے بھی گزشتہ چند روز کے دوران ٹرمپ سے رابطے کیے ہیں۔

ان رہنماؤں نے امریکی صدر کو مشورہ دیا ہے کہ ایران کے ساتھ مذاکرات اور سفارتی کوششوں کو مزید وقت دیا جائے اور نئی فوجی کارروائی سے گریز کیا جائے۔

علاقائی رہنماؤں کو خدشہ ہے کہ ایران پر دوبارہ حملوں کی صورت میں تہران کی جانب سے بڑے پیمانے پر جوابی کارروائی کی جا سکتی ہے، جس کے اثرات مشرق وسطیٰ کے دیگر ممالک تک پھیل سکتے ہیں اور خطے کا امن مزید متاثر ہو سکتا ہے۔

ایران بھی خبردار کر چکا ہے کہ دوبارہ حملے کیے گئے تو وہ بھرپور جواب دے گا اور تنازع کو مشرق وسطیٰ سے باہر تک پھیلایا جا سکتا ہے۔

دوسری جانب امریکا اور ایران کے درمیان جنگ بندی اور عبوری معاہدے کے لیے ثالثی کی کوششیں کئی ہفتوں سے جاری ہیں، تاہم دونوں فریقوں کے درمیان اختلافات تاحال برقرار ہیں۔

فنانشل ٹائمز کے مطابق، مذاکرات میں ایران کی جانب سے ستمبر میں پیش کیے گئے سات روزہ منصوبے کی بنیاد پر عبوری معاہدے کی تجویز بھی زیرِ غور ہے، تاہم صدر ٹرمپ پہلے ہی اس منصوبے کو مسترد کر چکے ہیں۔

ادھر قطری نشریاتی ادارے الجزیرہ نے پیر کے روز ایک باخبر ذریعے کے حوالے سے بتایا کہ قطری وزیراعظم کی صدر ٹرمپ اور امریکی نائب صدر جے ڈی وینس سے الگ الگ ملاقاتوں میں ایران کے معاملے پر مثبت پیش رفت ہوئی ہے۔

ایک سفارتی ذریعے کے مطابق، ان ملاقاتوں کا بنیادی مقصد امریکا اور ایران کے درمیان اختلافات کم کرنا اور مذاکرات کی بحالی کے لیے کوئی قابلِ عمل راستہ تلاش کرنا تھا۔

دریں اثنا، ایران کی نیم سرکاری خبر رساں ایجنسی فارس نیوز نے ایک نامعلوم ایرانی عہدیدار کے حوالے سے ان خبروں کی تردید کی ہے کہ آبنائے ہرمز دوبارہ کھولنے کے بدلے ایران کے منجمد 8 ارب ڈالر کے اثاثے جاری کرنے پر بات چیت ہو رہی ہے۔

ایرانی عہدیدار کا کہنا تھا کہ تہران واشنگٹن کے ساتھ صرف اپنی پیش کردہ سات شرائط کی بنیاد پر مذاکرات کرے گا۔ ان شرائط میں بحری ناکہ بندی اور یکطرفہ پابندیوں کا خاتمہ، منجمد ایرانی اثاثوں کی واپسی اور جنگ کا مکمل خاتمہ شامل ہیں۔

واضح رہے کہ امریکا اور اسرائیل نے 28 فروری کو ایران کے خلاف حملوں کا آغاز کیا تھا۔ بعد ازاں جولائی میں لڑائی ختم کرنے کے لیے ایک مفاہمتی یادداشت طے پائی، تاہم سفارتی کوششوں میں تعطل کے بعد دوبارہ جھڑپیں شروع ہو گئیں۔