وزیراعظم شہباز شریف کا سوڈان کی خودمختاری، اتحاد اور علاقائی سالمیت کی حمایت کا اعادہ

انطالیہ (صداے سچ نیوز) وزیراعظم شہباز شریف نے جمعرات کو پاکستان اور سوڈان کے دیرینہ برادرانہ تعلقات کی توثیق کرتے ہوئے سوڈان کی خودمختاری، اتحاد اور علاقائی سالمیت کے لیے پاکستان کی غیر متزلزل حمایت کا اعادہ کیا۔

وزیراعظم شہباز شریف اور جمہوریہ سوڈان کی عبوری خودمختاری کونسل کے صدر جنرل عبدالفتاح البرہان کے درمیان یہاں کوپ 31 کے اعلیٰ سطحی اجلاس کے موقع پر دوطرفہ ملاقات ہوئی، جس میں دونوں ممالک کے تعلقات پر تبادلہ خیال کیا گیا۔

ملاقات کے دوران وزیراعظم نے موجودہ چیلنجز کے تناظر میں سوڈان کے برادر عوام کے ساتھ یکجہتی کا اظہار کیا۔

دونوں رہنماؤں نے باہمی دلچسپی کے مختلف شعبوں میں دوطرفہ تعلقات مزید مستحکم بنانے کے امکانات پر مفید گفتگو کی۔

انہوں نے موسمیاتی تبدیلی کے چیلنج اور اس کے اثرات سے نمٹنے کے لیے عالمی تعاون بڑھانے کی اہمیت پر بھی تبادلہ خیال کیا، خصوصاً ترقی پذیر ممالک کو درپیش مشکلات کا ذکر کیا۔

دونوں فریقین نے کثیرالجہتی فورمز پر قریبی رابطہ کاری برقرار رکھنے کے عزم کا بھی اعادہ کیا۔