بنوں؛  پولیس چوکی پر دہشتگردوں کا حملہ ناکام، جوابی کارروائی میں 4 خوارج ہلاک

بنوں (صداے سچ نیوز) بنوں میں کنگر پل پولیس چوکی پر فتنۃ الخوارج کا حملہ ناکام بنا دیا گیا، جس میں پولیس کی بروقت کارروائی میں 4 خوارج ہلاک ہوگئے۔ وفاقی وزیرداخلہ محسن نقوی اور آئی جی خیبرپختونخوا نے پولیس اور سی ٹی ڈی کی کارروائی کو سراہا ہے۔

فتنۃ الخوارج کے دہشتگردوں نے گزشتہ نصف شب چوکی کنگر پل پر بزدلانہ حملہ کیا، تاہم بیدار اور چوکس پولیس اہلکاروں نے دفاعی حکمت عملی کے تحت مؤثر جواب دیا۔ بنوں پولیس کی بروقت اور فوری کارروائی سے حملہ ناکام بنا دیا گیا۔

حملے کی اطلاع ملتے ہی تازہ دم دستوں کی کمک، کوئیک رسپانس فورس اور سی ٹی ڈی نے جائے وقوع پہنچ کر کلیئرنس آپریشن کیا۔ اس دوران 4 خوارج کی لاشیں ملیں، جن سے اسلحہ اور ایمونیشن بھی برآمد ہوا۔ حکام کے مطابق لاشوں کی شناخت کی جا رہی ہے۔

انسپکٹر جنرل آف پولیس خیبرپختونخوا ذوالفقار حمید نے خوارج کے بزدلانہ حملے کا بروقت اور فوری جواب دینے پر بنوں پولیس کی تعریف کی ہے۔ انہوں نے کہا کہ رات کی تاریکی میں دہشتگردوں کے بزدلانہ حملے کو کامیابی سے پسپا کرنا ہمارے جوانوں کی اعلیٰ تربیت اور جانبازی کا ثبوت ہے۔ دہشتگردوں کے لیے خیبرپختونخوا کی سرزمین پر کوئی جگہ نہیں، ان کا خاتمہ یقینی بنائیں گے۔

پولیس اور سی ٹی ڈی کے بہادر سپوتوں پر ناز ہے، محسن نقوی

دوسری جانب وفاقی وزیرداخلہ محسن نقوی نے بنوں میں پولیس چوکی پر خوارجیوں کا حملہ ناکام بنانے پر پولیس اور سی ٹی ڈی کو سراہا  ہے۔

انہوں نے 4 دہشتگردوں کو جہنم واصل کرنے پر پولیس اور سی ٹی ڈی کی پیشہ ورانہ صلاحیتوں اور عزم کو سراہتے ہوئے کہا کہ خیبرپختونخوا پولیس اور سی ٹی ڈی کے جوانوں نے جرات کے ساتھ خوارجیوں کا حملہ ناکام بنایا۔

محسن نقوی نے کہا کہ خیبرپختونخوا پولیس اور سی ٹی ڈی کے بہادر سپوتوں پر ناز ہے۔ خیبرپختونخوا میں قیام امن کے لیے پولیس اور سی ٹی ڈی کے اقدامات کو خراج تحسین پیش کرتا ہوں۔