متاثرین اسلام آباد کو زبردستی گھروں سے نکالنے کیلئے وفاقی حکومت انتظامی مشینری استعمال کر رہی ہے، تنویر حسین عباسی

اسلام آباد (صدائے سچ نیوز)پارلیمنٹ میں موجود سیاسی جماعتیں متاثرین اسلام آباد کی آبادکاری کے حقوق کے حصول میں مدد کریں، جن کی ہزاروں ایکڑ اراضی وفاقی دارالحکومت کے قیام کے لئے حکومت نے مارشل لاء کے تحت زبردستی اپنی تحویل میں لی تھی ۔ لیکن سی ڈی اے انہیں آباد کرنے کی بجائے ریاستی طاقت کے زور پر ںے دخل کر رہا ہے۔

ان خیالات کا اظہارچیئرمین عوام دوست گروپ نورپور شاہاں تنویر حسین عباسی نے اہل علاقہ کے ساتھ گفتگو کرتے ہوئے کیا ۔ انہوں نے کہا کہ متاثرین کو زبردستی گھروں سے نکالنے کے لئے چیف کمیشنر و چیئرمین سی ڈی اے محمد علی رندھاوا پولیس کا استعمال کر رہا ہے جو قابلِ مذمت ہے۔

ان کا مزید کہنا تھا کہ تاثر یہ دیا جا رہا ہے کہ سب کچھ طاقت ور ارباب اختیار کے نام پر کیا جا رہا ہے۔انہوں نے کہا کہ وفاقی دارالحکومت میں جس طرح حکومتی مشینری انسانی اور بنیادی حقوق کی پامالی کر رہی ہے ماضی میں اس کی مثال نہیں ملتی۔

تنویر عباسی نے کہا کہ اہلیان نورپور شاہاں کا اسلام آباد جانے کا ساڑھے تین سو سالہ پرانا راستہ نومبر 2025 سے بند کر دیا گیا ہے۔ جس کی وجہ سے نور پور شاہاں کے ایوان صدر کالونی سکول میں زیر تعلیم بچے چار ماہ سے سکول نہیں جاسکے۔ کیونکہ متبادل آنے جانے کا راستہ تین کلومیٹر کی بجائے 36 کلومیٹر بنتا ہے، جس کے سفری اخراجات والدین ادا نہیں کر سکتے۔

انہوں نے کہا کہ اب نور پور شاہاں بری امام کے رہائشیوں کے لیے پیدائش اور موت کے یونین کونسل کے دفتر میں اندراج پر پابندی لگا دی گئی ہے جبکہ اطلاعات ہیں کہ نور پور شاہاں کے پتہ کے ساتھ شناختی کارڈ کے اجراء کو بھی روکا جا رہا ہے ۔

انہوں نے پارلیمنٹ میں موجود سیاسی جماعتوں کے ارکان اسمبلی و سینیٹ سے اپیل کی ہے کہ وہ اجلاس کے دوران وقت نکال کر نور پور شاہاں ، سیدپور اور ملپور کے مکینوں سے ملاقات کریں اور ان کی داد رسی کے لیے اپنا کردار ادا کریں۔

چیئرمین عوام دوست گروپ نورپور شاہاں تنویر حسین عباسی نے مزید کہا کہ اگر متاثرین کے مسئلہ پر فوری توجہ نہ دی گئی تو وفاقی دارالحکومت میں لاکھوں افراد کی جبری بے دخلی سے انسانی المیہ جنم لے گا، جس کے ذمہ دار وفاقی وزیر داخلہ اور چیف کمیشنر ہوں گے۔